Кои 5 украински региони му се клучни на Кремљ?

Русија објави дека е подготвена да води разговори со Украина „без никакви предуслови“, но речиси во исто време рускиот министер за надворешни работи, Сергеј Лавров, постави низа јасни барања што откриваат дека Москва сè уште ги има условите за преговори.

Руските државни медиуми објавија дека Кремљ е подготвен за дијалог со Киев без однапред утврдени услови, неколку дена откако претседателот на САД, Доналд Трамп, изрази сомнежи во волјата на претседателот на Русија, Владимир Путин, да ја прекине тригодишната војна во Украина.

Сепак, во речиси истовремени изјави за бразилскиот весник „О Глобо“, Лавров нагласи дека меѓународното признавање на руската сопственост врз 5 украински региони – Крим, Севастопол и окупираните делови од Донецк, Луганск, Херсон и Запорожје е „императив“ за преговори за завршување на конфликтот.

- Advertisement -

– Меѓународното признавање на руската сопственост врз Крим, Севастопол, Донецката Народна Република, Луганската Народна Република, Херсонската и Запорошката област е императив – рече Лавров, користејќи ги имињата што Кремљ ги користи за украинските територии што се окупирани.

Лавров во интервјуто, исто така, рече дека „топката не е во наш двор“, имплицирајќи дека одговорност на Киев е да направи отстапки за да ги помести преговорите од ќор-сокакот.

Изјавите доаѓаат во време кога притисокот врз Украина расте по предлогот на администрацијата на Трамп за мировен договор што би вклучувал замрзнување на фронтовската линија и де факто признавање на руската контрола врз делови од украинската територија, вклучувајќи го и Крим.

Официјален Киев досега одбиваше какви било територијални отстапки, нагласувајќи дека територијалниот интегритет на Украина мора целосно да се почитува, во согласност со меѓународното право. Сепак, тие посочија дека „привремено отстапување“ од територијата би било можно, но без никакви законски обврски.