Кога политичката кариера чини колку Hyundai Tucson

Охрид – Додека граѓаните броат денари за леб, еден политички ентузијаст брои што му остана по изборната кампања. Спојлер: не многу.

Еден Hyundai Tucson 1.6 Turbo, специјална серија, единствен во Македонија. Цена: 23.500 евра. Причина за продажба: политички амбиции со рок на траење покус од млеко оставено на сонце.

Листата на “инвестиции” е импресивна – моливчиња со име и презиме, пенкалца што веројатно никој не ги употребил, запалки распространети како дождовни капки, маички со лик и дело што сега служат како пижами или крпи за забришување подови, и билборди чија единствена заслуга е што не паднале на некого на глава. Сето тоа, очигледно, чинело точно едно возило од средна класа.

- Advertisement -

Но приказната не завршува тука. Нашиот херој, воодушевен од почетните резултати (веројатно од неговата улица), веќе се видел себеси како пратеник. Затоа потегнал и во “престеделска” – онаа свештена благајна наменета за црни дни. Изборниот ден, како што се покажа, беше поцрн од најцрното кафе.

А потоа дојде цунамито. Не она цунами што носи вода, туку оној што носи реализација. Типот на пораз кога броиш гласови и продолжуваш да броиш надевајќи се дека математиката ќе се смилува. Не се смилува.

Во нормален свет, ваков резултат носи неотповикливи оставки, долга пауза од јавниот живот и пожелна посета на психолог. Но не и кај нашиот протагонист. Тој и понатаму се надева дека ќе остане претседател (на што, не е сосема јасно) и иден кандидат за пратеник!

Надежта, велат, умира последна. Реалноста, пак, возила Tucson кон новиот сопственик.

Политичката поука е едноставна: ако твојата кампања чини колку ново возило, а добиваш гласови колку да наполниш едно такси, можеби е време да се вратиш кон првичните животни планови. Оние што не вклучуваат билборди.

Засега, еден искусен Hyundai трага по нов дом, а еден помалку искусен политичар трага по нова стратегија. Или барем по останатите запалки.

Сашо ДЕНЕСОВСКИ