КАРПА СЕ УРНА ВРЗ АВТОБУС ПОЛН СО УЧЕНИЦИ ВО ЦРНА ГОРА

Карпа се одронила од планината и паднала врз автобус полн со ученици на магистралниот пат меѓу Мојковац и Колашин во Црна Гора. Несреќата се случила околу 20.45 часот кај Штитарицка Ријека, на околу 3 километри од Мојковац.

Автобусот превезувал основци кои биле на екскурзија. По ударот кон болницата во Бијело Поље веднаш биле упатени повредените, а на местото пристигнале сите расположливи екипи на Итната помош од Бијело Поље и Мојковац.

Првичните информации говореле за четири повредени деца и возачот, но подоцна од болницата било соопштено дека биле примени три 15-годишни ученички и две возрасни лица.

- Advertisement -

Кај девојчињата при приемот немало знаци за тешки повреди. Кај едно од возрасните лица, сепак, постоело сомнение за потешки телесни повреди, поради што била направена дополнителна дијагностика.

По несреќата почнала евакуација на учениците. Дел од нив кон Подгорица биле пренесени со возила на приватни превозници од Мојковац, а за останатите бил обезбеден друг автобус од агенцијата што ја организирала екскурзијата.

Втор автобус со ученици се движел непосредно зад возилото врз кое паднала карпата. Полицијата го придружувала кон Колашин и Подгорица, додека дел од родителите пристигнале на местото и сами ги презеле своите деца.

Според неофицијалните информации од црногорската полиција, возачот не бил под дејство на алкохол. Истрагата треба да ги утврди околностите на одронот и ударот.