Обожавателите на легендарниот холивудски актер Џек Николсон веројатно повеќе нема да го гледаат во нови филмски улоги. Тоа го откри неговиот долгогодишен пријател и колега Мајкл Даглас, кој потврди дека Николсон се повлекол од актерството и дека поголемиот дел од времето го поминува далеку од очите на јавноста.
Даглас зборувал за Николсон за време на промоцијата на своите мемоари „One Helluva Ride“. На прашањето дали постои можност двајцата конечно да се појават заедно во филм, Даглас одговорил дека би сакал тоа да се случи, но додал дека Николсон веќе не работи.
– Добро е. Го нема, тоа го знам. Сè уште го гледам, но добро е – изјавил Даглас, обидувајќи се да ги смири обожавателите загрижени поради долгото отсуство на актерот од јавноста.
Тој открил дека Николсон поголемиот дел од времето го минува мирно, во својот дом, далеку од Холивуд.
– Таму е, во својата куќа, и шета во влечки. Така е тоа. Го заслужи тоа. Го разбирам. Неколку години е постар од мене, но го разбирам – изјавил Даглас за „Дејли мејл“.
Никогаш не снимиле филм заедно
Иако и двајцата имаат долга историја во Холивуд, Николсон и Даглас никогаш не глумеле заедно во ист филм. Даглас беше копродуцент на култниот филм „Лет над кукавичјото гнездо“ од 1975 година, за кој Николсон го освои својот прв Оскар. Токму Даглас имал важна улога во ангажирањето на Николсон за филмот.
Николсон почна поотворено да зборува за повлекувањето од актерството во 2013 година. Тогаш изјави дека повеќе нема толку голема желба да биде постојано присутен во јавноста и дека би прифатил улога само ако станува збор за приказна што навистина го привлекува и зборува за човечките емоции.
По филмот „How Do You Know“ од 2010 година, во кој глумеше со Рис Витерспун, Пол Рад и Овен Вилсон, Николсон не прифати нова филмска улога. Во 2013 година се појавија медиумски извештаи дека причината за неговото повлекување се проблеми со памтењето, но актерот никогаш јавно не потврди дека тоа е причината за неговата одлука.
Три Оскари и кариера долга повеќе од пет децении
Роден во 1937 година во Њу Џерси, Николсон е еден од најценетите американски актери. Неговата кариера траеше повеќе од пет децении, а публиката го памети по улогите во филмовите „Сјаење“, „Кинеска четврт“, „Бетмен“, „Покојните“ и „Колку е добро да си жив“.
Тој освои три Оскари – за главните улоги во „Лет над кукавичјото гнездо“ и „Колку е добро да си жив“, како и за споредната улога во „Времето на нежноста“. Вкупно има 12 номинации за Оскар, што го прави еден од најноминираните актери во историјата на наградите.
Последното негово појавување на екраните беше во специјалната емисија на „Сабота навечер во живо“ во 2025 година, посветена на 50-годишнината од шоуто. Иако одамна не се појавува во нови филмови, Николсон и понатаму останува една од најпрепознатливите личности во историјата на Холивуд.
