Јапонија официјално го регистрираше својот прв кокушоби, или „неподносливо топол ден“, нов термин воведен во април за денови кога температурите надминуваат 40 степени Целзиусови

Јапонија во вторник официјално го регистрираше својот прв кокушоби, или „неподносливо топол ден“, нов термин воведен во април за денови кога температурите надминуваат 40 степени Целзиусови.

Јапонската метеоролошка агенција (JMA) воведе ново предупредување за екстремна топлина за да ја предупреди јавноста за растечките опасности од високи температури, кои некогаш беа ретки временски феномени, но сега стануваат сè почести, објавува The Guardian.

Температурите достигнаа 40 степени
Градовите Гуџо и Таџима, во префектурата Гифу, и Тојота, во префектурата Аичи, достигнаа 40 степени Целзиусови.

- Advertisement -

Гуџо измери точно 40 степени, додека Тојота регистрираше 40,1 степени Целзиусови, што се рекордни вредности на метеоролошките станици во тие градови.

Од вкупно 914 метеоролошки станици низ Јапонија, 278 од нив измериле температури повисоки од 35 степени Целзиусови. Ваквите денови се означени со терминот мошоби или „екстремно топол ден“, кој до воведувањето на новата ознака претставуваше највисоко ниво на предупредување.

Деновите со температура над 25 степени се нарекуваат нацуби или „летни денови“, додека оние со повеќе од 30 степени се означени како манацуби, т.е. „вистински летни денови“.

Две лица починаа како резултат на топлината
Во понеделник, маж во 40-тите години беше пронајден мртов на улица во градот Санџо, префектурата Ниигата, додека друг маж во 70-тите години почина во префектурата Канагава, југозападно од Токио.

Се верува дека двајцата починале како резултат на екстремната топлина.

Повеќе од 2.000 смртни случаи и 100.000 хоспитализации
Бројот на смртни случаи предизвикани од топлотен удар надмина 2.000 за прв пат во текот на 2024 година.

Во исто време, помеѓу почетокот на мај и крајот на септември минатата година, повеќе од 100.000 луѓе беа хоспитализирани поради ефектите од високите температури, според податоците на Јапонската агенција за управување со пожари и катастрофи.

Летата во Јапонија стануваат сè потопли
Според Јапонската метеоролошка агенција, просечната летна температура во Јапонија се зголемила за околу 1,3 степени Целзиусови во последните 100 години.

Годините 2023 и 2024 беа најтоплите откако се водат евиденции, т.е. од 1898 година. Сепак, годината 2025 ги надмина двата рекорда – просечната летна температура беше за 2,4 степени Целзиусови повисока од просекот забележан во претходните три децении.