Јанчев: Да се истражи кој стои зад пожарот во депонијата „Мелци“

На депонијата „Мелци“ продолжува интензивната интервенција. Екипите ќе работат се додека не биде изгаснат и последниот жар и не се создадат услови за целосно ставање на пожарот под контрола, соопшти доцна синоќа кавадаречкиот градоначалник Митко Јанчев.

– Станува збор за пожар кој, според досегашните сознанија и начинот на неговото избивање, покажува сериозни индиции дека е подметнат. Ова не е само напад врз депонијата – ова е напад врз градот, граѓаните и животната средина – додаде Јанчев на Фејсбук.

Тој истакна дека надлежните институции мора да го истражат случајот до крај.

- Advertisement -

– Оние кои намерно го загрозуваат здравјето и безбедноста на граѓаните, мора да одговараат – додаде кавадаречкиот градоначалник.

Јанчев информираше и дека синоќа била одржана итна седница на Кризниот штаб со која раководел самиот тој, за справување со пожарот на градската депонија.

– Присутни беа претставници од Советот на Општината, ОВР – Кавадарци, ТППЕ – Кавадарци, ЈП „Комуналец“, „Мој општинар“ и општествено – одговорни компании – појасни Јанчев.

Градоначалникот информираше и за донесените заклучоци.

– Продолжување на акцијата – пожарот е локализиран, а целосното гаснење продолжува и во раните утрински часови. Дополнителна поддршка – во акцијата се вклучуваат приватни компании од Кавадарци со сопствена механизација. Координација – распоредувањето на терен се врши под координација на ТППЕ – Кавадарци и ЈП „Комуналец“ – се наведува во објавата на Фејсбук.

Кризниот штаб, како што додаде Јанчев, продолжува непрекинато да ја следи состојбата.