Израелскиот парламент се распушти, избори на 27 октомври

Израелскиот парламент денес гласаше за самораспуштање, овозможувајќи избори на 27 октомври, на кои премиерот Бенјамин Нетанјаху очекува да освои уште еден мандат, и покрај падот на популарноста.

Самораспуштањето на Кнесетот беше изгласано откако во последен момент беа усвоени низа контроверзни закони, при што владата се обидуваше да ги смири своите партнери во владејачката коалиција.

Предлогот за распуштање на парламентот беше усвоен со 62 гласа „за“ од вкупно 120 членови на парламентот, објавува „Тајмс оф Израел“. Никој не гласаше против.

- Advertisement -

Претходниот ден, израелскиот парламент усвои сеопфатни медиумски реформи, предложени од министерот за комуникации Шломо Кархи, и значително ќе ја прошират владината контрола врз електронските и печатените медиуми.

Новите законски решенија вклучуваат укинување на механизмите за надзор, минимални новинарски стандарди, обврска за инвестирање во оригинални израелски продукции и ограничувања за вкрстено сопствеништво, додека тие ќе го зголемат влијанието на владата врз телевизиските рејтинзи и дистрибуцијата на државното рекламирање.