Италија заплени имот вреден над 200 милиони евра на починатиот шеф на мафијата

Италијанската полиција објави дека во меѓународна операција запленила имот, компании и финансиски средства во вредност од над 200 милиони евра што му припаѓале на починатиот шеф на сицилијанската мафија, Матео Месина Денаро.

Италијанската полиција денес објави дека во меѓународна операција запленила имот, компании и финансиски средства во вредност од над 200 милиони евра што му припаѓале на починатиот шеф на сицилијанската мафија, Матео Месина Денаро, во неколку даночни раеви, објавија странските новински агенции.

Финансиската полиција објави дека под покровителство на шефот на сицилијанската мафија, Коза Ностра, Месина Денаро, кој почина во 2023 година, ова богатство е создадено „со повторна употреба, исто така преку офшор компании, на профитот стекнат од 1980-тите во трговијата со дрога“.

- Advertisement -

Операцијата ја координирале истражителите од единицата за борба против мафијата во Палермо и ја спровела финансиската полиција. Освен во Италија, операцијата беше спроведена и во Андора, Гибралтар, Кајманските Острови, Луксембург, Швајцарија, Либан, Монако и Шпанија, во соработка со локалната полиција. Како дел од операцијата, уапсени се уште тројца осомничени за користење пари од нелегално потекло, објавува италијанската новинска агенција Анса.

Матео Месина Денаро беше еден од најсуровите шефови на Коза Ностра, отслужувајќи неколку доживотни казни за убиства, вклучително и неговата вмешаност во бомбашките напади во Фиренца, Рим и Милано во 1993 година, во кои загинаа десет лица. Тој беше осуден и за вмешаност во атентатот во 1992 година врз истакнатите судии против мафијата, Џовани Фалконе и Паоло Борселино.

Тој исчезна во 1993 година и помина 30 години во бегство како најбаран криминалец во Италија. Откако беше уапсен во јануари 2023 година, почина во затвор во септември од рак.