Истражителите проверуваат врска со други слични случаи во кумановско

Јавниот обвинител од Основното јавно обвинителство Куманово поднесе наредба за спроведување истражна постапка против 25-годишник за кривично дело убиство, откако тој, според истрагата, на свиреп и подмолен начин ја лишил од живот 75-годишната жена родена во 1947 година.

Според Обвинителството, осомничениот ја искористил околноста што жртвата живеела сама, била стара и немоќна.

– Кога влегол во куќата на оштетената, која спиела на креветот, осомничениот физички ја нападнал, нанесувајќи ѝ повеќе удари од кои жената починала – соопштија од ОЈО Куманово.

- Advertisement -

Истражните органи во координација со МВР и Институтот за судска медицина обезбедиле докази кои упатуваат дека случајот може да има врска со неколку други слични убиства во кумановско.

– Заради сличностите во изборот на жртвата и суровиот начин на извршување на делото, испитуваме дали и во тие случаи станува збор за ист сторител – велат од Обвинителството.

За една од потенцијалните жртви вчера беше извршена ексхумација и обдукција. Од телото на починатата жена се подигнати траги и ДНК кои сега се вештачат. Истражните органи исто така спроведуваат сложени вештачења и анализи, како и други дејствија за обезбедување докази, кои во моментов не можат да се споделат со јавноста поради тајноста на постапката.

– Осомничениот веднаш е лишен од слобода и од страна на јавниот обвинител му е определен притвор. Наредено е и психијатриско вештачење од страна на тим форензички психијатри од Институтот за психијатрија во Скопје – изјавија од Обвинителството.

Според првичните информации, истрагата е во тек и се очекува да даде одговор дали 25-годишникот е поврзан со други слични убиствени случаи во регионот.