ХАКЕРИ ГИ СТОПЛИЈА ФРИЖИДЕРИТЕ ВО МАРКЕТИ ВО БЕЛГИЈА, ЛУКСЕМБУРГ И ВО ШВЕДСКА

Повеќе од 70 продавници и супермаркети во Белгија, Луксембург и во Шведска синоќа беа мета на хакерски напад, при кој е зголемена температурата на фрижидерите и замрзнувачите, а храната е фрлена за да се избегнат безбедносни ризици, соопштија денеска претставниците на трговските синџири.

Системите за ладење биле нарушени во повеќе од 40 супермаркети „Делиз“ во Белгија и Луксембург, а слични проблеми пријавија и малопродажните синџири „Карфур“ и „Спар“ во дваесетина нивни супермаркети.

Извршниот директор на ладилниците „Сабкобел“, Стефан Моланс наведе дека хакерите од далечина ги префрлиле испарувачите на системот во режим на одмрзнување, што предизвикало загревање на фрижидерите.

- Advertisement -

– Ги мобилизиравме техничарите во еден часот по полноќ за да ја ставиме ситуацијата под контрола. Работевме цела ноќ и до утрото, за да ги исклучиме погодените инсталации од мрежата – изјави Моланс, додавајќи оти некои продавници морале да фрлаат производи.

И во Шведска била зголемена температурите во фрижидерите и замрзнувачите во некои продавниците. Неколку продавници на „Ици“ утрово објавија на социјалните мрежи дека нивните фрижидери и замрзнувачи биле хакирани, а артиклите биле уништени.

Во централна Шведска 6 продавници на „Коп“ исто така, пријавиле дека биле цел на хакери кои ги покачиле температурите во нивните фрижидери и замрзнувачи.

Сличен инцидент се случи во Франција на 12 октомври, кога стотици продавници беа цел на хакери, кои ја покачија температурата во замрзнувачите и во фрижидерите на 50 степени Целзиусови. Канцеларијата на парискиот обвинител тогаш соопшти дека „голем“ кибернапад ги погодил мрежно поврзаните ладилници во неколку големи продавници за храна низ цела Франција.