Германските власти идентификувале двајца мажи осомничени дека се поврзани со обидот за напад со дрон врз аеродромот Лајпциг-Хале, но според „Зидојче цајтунг“ веројатно нема да можат да ги уапсат
Германските власти идентификувале двајца мажи осомничени дека се поврзани со обидот за напад со дрон врз аеродромот Лајпциг-Хале, но според „Зидојче цајтунг“ веројатно нема да можат да ги уапсат.
Истрагата против двајцата осомничени дополнително ги поткрепува сомневањата на германските власти дека зад инцидентот стои Русија, објави германскиот весник.
Според информациите, едниот осомничен е државјанин на Летонија, но е роден во Русија. Вториот е руски државјанин кој потекнува од Белорусија.
Се истражува нивната можна поврзаност со инцидентот на аеродромот, каде што на 4 август беше пронајден дрон опремен со експлозив.
Дронот бил откриен во безбедносната зона на аеродромот Лајпциг-Хале и подоцна бил деактивиран.
Особено внимание предизвикал фактот што во близина се наоѓале неколку украински карго-авиони. Аеродромот Лајпциг-Хале воедно е важен центар за транспорт на воена помош за Украина.
Германските истражители претходно откриле и траги од воен експлозив во близина на аеродромот. Според досегашните информации, во инцидентот можеби бил вклучен и најмалку уште еден дрон.
Случајот предизвика сериозна загриженост во Германија, особено поради сомневањата дека станува збор за дел од пошироки руски хибридни активности насочени кон европската инфраструктура.
Германските власти претходно соопштија дека истрагата покажува знаци на професионално планирање и значителна техничка и организациска експертиза.
Иако се идентификувани двајца осомничени, нивното апсење засега е неизвесно. Истрагата продолжува, а германските служби се обидуваат да ги утврдат нивните конкретни улоги, како и евентуалните врски со други лица и организации.
ЗА НАС
ОhridSky е ваш доверлив извор за сеопфатно и избалансирано покривање на вестите. Со посветеност на интегритет и точност, обезбедуваме длабинско известување кое ги открива приказните што се најважни.
Links
© 2025 OhridSky. Сите права задржани.
