Поранешниот француски претседател Никола Саркози беше на судење во понеделникот под обвинение дека примил милиони евра нелегално финансирање од покојниот либиски моќник Моамер Гадафи за неговата успешна претседателска кандидатура во 2007 година, јави Ројтерс.
Судењето се очекува да трае во следните три месеци. Доколку биде прогласен за виновен, Саркози може да се соочи со 10 години затвор и 375.000 евра парична казна.
Инспекторите тврдат дека Сарко склучил коруптивен договор со либиската влада. Во прашање е матна афера за која се тврди дека вклучува либиски шпиони, осуден терорист, трговци со оружје и наводи дека Гадафи на кампањата на Саркози ѝ дал милиони евра испорачани во Париз во куфери.
Адвокатот на Саркози рече дека случајот против поранешниот претседател е измислица и дека немало либиско финансирање на кампањата.
– По 10 години истрага, со невидено распоредување ресурси, прислушување, судии кои патуваат во странство, насекаде низ светот, очигледно нема ни трага од финансирање, ни трансфер, ни плаќање, дури ни сума за наводното финансирање – рече адвокатот Кристоф Ингрејн.
Кариерата на Саркози е во сенка на правните предизвици по неговиот пораз на претседателските избори во 2012 година, но тој останува влијателен и е познато дека редовно се среќава со претседателот Емануел Макрон.
Жестоко амбициозниот и енергичен 69-годишник, кој сакаше да биде познат како „хипер-претседател“ додека беше на власт од 2007 до 2012 година, беше осуден во два случаи, обвинет во друг и е под истрага во уште два.
