Фински и шведски борбени авиони следеа руски воени авиони над Финскиот Залив

Финската војска соопшти дека шведски и фински авиони денеска биле ангажирани над Финскиот Залив за пресретнување и идентификација на руски воени летала. Ова претставуваше прва заедничка операција на финските и шведските сили за противвоздушна одбрана, при што во меѓународниот воздушен простор беа следени еден руски транспортен авион и неколку борбени авиони.

Според финската војска, ова била прва заедничка операција за откривање и идентификација на руски воени летала, спроведена од шведски и фински воени авиони за брза реакција. Операцијата била предводена од Финска.

Тие идентификувале група руски летала – составена од транспортен авион „Ту-134“ и борбени авиони „МиГ-31“ и „Су-30“ – во „меѓународниот воздушен простор над Финскиот Залив“, пренесува француската новинска агенција АФП.

- Advertisement -

„Балтичкото Море никогаш не било толку ранливо како денес, но истовремено никогаш не било ниту толку добро заштитено“, напиша шведскиот премиер во заминување, Улф Кристерсон, на социјалната мрежа „Икс“ (X) по повод заедничката операција.

По почетокот на руската инвазија врз Украина во 2022 година, Шведска и Финска се откажаа од својата повеќедецениска политика на воена неутралност и се приклучија кон НАТО. Тензиите во регионот на Балтичкото Море нагло пораснаа во последните години, а борбените авиони редовно полетуваат за да пресретнат руски летала, пренесува АФП.