Филипче: Дата центрите имаат нејонизирачко електромагнетно зрачење

„Понатаму, што ќе се случи со буката во околината на поставувањето на тие дата центри? Една од причините зошто ги дислоцираат или не дозволуваат развиените земји и поставување на дата центри е тоа што има енормна, неподнослива бука. Понатаму има нејонизирачко електромагнетно зрачење околу. Кој ќе сака да живее во таква средина?“, потенцираше Филипче.

Претседателот Филипче посочи дека најавите за дата центрите се претставуваат како развој, но остануваат неодговорени низа конкретни прашања за нивното влијание и за тоа каква корист ќе имаат граѓаните.

„Тоа дека дата центрите се некој развој од којшто бенефит ќе видат граѓаните, е само уште еден спин и дефокус на Христијан Мицкоски. Каков бенефит ќе имаат граѓаните од дата центрите? Имаме ли ние доволен капацитет на струја за тие дата центри, таму каде што ќе се? Дали тоа ќе ја повлече целата струја од регионот, од местото во коешто дата центрите ќе бидат лоцирани? Што ќе се случи со цената на струјата, кога ќе има еден таков потрошувач на струја од соодветна околина?“, потенцираше претседателот на СДСМ, Венко Филипче.

Филипче посочи и на користењето на водните ресурси, влијанието врз реките и достапноста на вода за земјоделските површини.

„Што ќе се случи со топлата вода која ќе треба да се врати некаде? А која ќе се зема од реките? Ќе се уништи ли природниот свет во реките? Што ќе се случи со капацитетот на водата? Ќе има ли вода за наводнување на земјоделските површини? Тоа никој не го кажува. Понатаму, ќе има ли зголемена потреба за увозна струја? И да резимирам, лага е дека тоа е напредок на земјата. Напредок на земјата се добри економски политики, мерки за граѓаните, зголемување на платите, зголемување на минималната плата, мерки за граѓаните кога има криза, како сега што има со горивата поради војната во Блискиот Исток, добри пензии, не да ги крадат пензиите, со линеарно зголемување, понатаму реформи на системот и Европа. Нема друга формула за успех. Сè друго е само еден спин во бизнис интерес на власта и на никој друг.“, рече Филипче.