ФИФА го суспендира здружението поради политичко мешање во фудбалот

ФИФА го суспендираше Фудбалскиот сојуз на Непал од членство поради политичко мешање во работата на националниот сојуз, а одлуката стапува на сила веднаш и ќе остане на сила до понатамошно известување.

Веќе е испратено официјално известување до сите национални фудбалски здруженија низ целиот свет, со што практично Непал останува без можност да учествува на меѓународни натпреварувања.

Суспензијата значи дека националниот тим на Непал, како и сите клубови таму, нема да можат да учествуваат на меѓународни натпревари и турнири. Во исто време, на оваа азиска земја ѝ е забранет пристап до сите програми за развој, образование, курсеви и финансиска помош што ги обезбедуваат ФИФА и Азиската фудбалска конфедерација (АФЦ).

- Advertisement -

Дополнително, ФИФА им забрани на сите свои здруженија членки каква било спортска соработка со Непал за време на суспензијата.

Светската фудбалска организација како главна причина го наведе грубото политичко мешање во спортот, што е сериозно кршење на статутите на ФИФА. Според достапните информации, суспензијата дојде откако државното спортско тело во Непал се обиде да ја преземе контролата и да влијае врз работата на локалниот фудбалски сојуз, што предизвика итна реакција од Цирих.

Одлуката беше донесена во времето на Светското првенство во САД, Канада и Мексико, каде што ФИФА повторно испраќа јасна порака дека нема да толерира политичко мешање во работата на националните фудбалски асоцијации.