ЕВРОПА ВОВЕДУВА НОВ ДАНОК ЗА ГОЛЕМИТЕ ТЕХНОЛОШКИ КОМПАНИИ

Европската Унија разгледува воведување данок за големите компании, што би ги вклучило и големите американски технолошки компании, во обид да ги зголеми приходите на ЕУ и во исто време да избегне негативна реакција од администрацијата на американскиот претседател Доналд Трамп, пишува „Фајненшл тајмс“ (FT).

Европската комисија разгледува нови начини за зголемување на приходите од технолошките компании како Apple, Meta и Google, без да ги издвои, објави весникот, повикувајќи се на шест функционери запознаени со разговорите.

Брисел разгледува измени во предлогот „Корпоративни ресурси за Европа“ (CORE), според кој сите компании што работат во ЕУ и генерираат годишен приход од над 100 милиони евра би плаќале годишен фиксен данок.

- Advertisement -

Според сегашниот предлог на CORE, тие компании би плаќале годишен фиксен данок во износ од 100.000 до 750.000 евра, што би покривало само мал дел од заработката на мултинационалните компании.

„Некои главни градови се спротивставуваат на дигиталниот данок исклучиво затоа што не сакаат да ги вознемират Американците, додека многу други се спротивставуваат на CORE. Решението е да се прошири (данокот) за да ги опфати речиси сите големи компании“, изјави еден функционер на ЕУ за британскиот весник.

Претседателот на САД, Доналд Трамп, во јуни се закани дека ќе воведе 100-процентна царина на сите стоки од земјите што наметнуваат данок на дигитални услуги на американските компании.

Канцеларијата на трговскиот претставник на САД долго време им се закануваше на европските земји со воведување одмазднички царини доколку воведат такви даноци, тврдејќи дека тие дискриминираат американски компании што имаат доминантна позиција во глобалниот технолошки сектор.