Еве како е направено лажното видео во кое Норвежанецот се плаши од сопствениот одраз во огледало

Виралното видео во кое норвешката фудбалска ѕвезда Ерлинг Халанд наводно се преплашува кога ќе го види својот одраз во огледало насмеа милиони корисници на социјалните мрежи. Клипот за само неколку дена собра повеќе од 50 милиони прегледи, а многумина поверуваа дека станува збор за вистинска, спонтано снимена сцена.

Сепак, повеќе независни факт-чек организации потврдија дека видеото е дигитално манипулирано и не прикажува реален настан.

- Advertisement -

Според анализите, станува збор за таканаречена „face swap“ техника со вештачка интелигенција, со која лицето на Халанд е поставено врз оригинално видео од друго лице. Всушност, оригиналната снимка не го прикажува норвешкиот напаѓач, туку кинески комичар кој изведува хумористичен скеч во кој се преплашува од сопствениот одраз додека јаде.

Факт-чекерите откриле повеќе визуелни неправилности. При анализа кадар по кадар се забележува дека увото на лажниот Халанд има неприродна форма, а во еден момент прстите на раката се заматуваат и речиси се спојуваат – типичен детал што често се појавува кај видеа создадени или изменети со генеративна вештачка интелигенција.

Дополнителна проверка била направена со неколку алатки за откривање АИ-содржини. Една од нив оценила дека видеото е дури 91% генерирано со вештачка интелигенција, додека други две алатки покажале веројатност од околу 53%. Иако процентите се разликуваат, сите анализи водат до ист заклучок – снимката не е автентична.

Во меѓувреме, самата платформата Икс додаде ознака дека станува збор за АИ-манипулирана содржина и во контекстот на објавата беше споделена врска до оригиналното видео од кое е направен фалсификатот. Со обратна пребарувачка на кадрите, факт-чекерите стигнале до најстарата достапна верзија на снимката, објавена на Фејсбук на 19 јуни 2026 година.

Случајот со Халанд уште еднаш покажува колку убедливо денес можат да изгледаат видеата создадени со вештачка интелигенција. Иако овој пример е хумористичен и не предизвикува сериозна штета, експертите предупредуваат дека истите технологии сè почесто се користат за креирање лажни снимки кои можат да ја доведат јавноста во заблуда. Затоа, кога некое видео изгледа необично или премногу сензационално, секогаш е препорачливо да се провери дали веќе било предмет на независна факт-чек анализа.