ДВАЈЦА ЗАГИНАА ВО СУДИР НА ПРОТИВПОЖАРНИ ХЕЛИКОПТЕРИ ВО ГРЦИЈА

Двајца загинати е билансот на несреќата што се случи кога два противпожарни хеликоптера „Бел“ се судрија во воздух, за време на гаснење на големиот шумски пожар кај Псата, западно од Атина. Во несреќата животите ги загубија романски пилот и грчки навигатор, додека останатите двајца членови на екипажите се спасени. Пилотите на двата хеликоптера биле Романци, а навигаторите Грци.

Според првичните информации, леталата се судриле при ниско летање, по што едниот хеликоптер се урнал, а другиот успеал да исфрли вода и безбедно да слета.

– Во двата хеликоптера беа вкупно четворица мажи, од кои двајца грчки и двајца странски државјани. Двајца од нив се пронајдени живи, додека двајца беа извлечени без знаци на живот и беа преземени од возила на итната медицинска помош – соопштија од противпожарната служба на Грција.

- Advertisement -

Пожарот кај Псата е еден од најголемите што ја зафатија Грција во последните денови. Огнената стихија уништи повеќе од 100 куќи, а силниот ветер дополнително го отежнува гаснењето и ги принуди властите да издадат наредби за евакуација на повеќе населени места.