ДЕЖУРНИ НАСТАВНИЦИ НА ОДМОРИТЕ ВО СЕКОЕ УЧИЛИШТЕ

Министерството за образование и наука (МОН) постапува по закон и сопствените ингеренции, случајот со врсничко насилство во основно училиште во Ѓорче Петров е пријавен во Државниот просветен инспекторат (ДПИ), изјави министерката за образование Весна Јаневска.

Таа вели дека министерството дополнително се обратило до градоначалниците и испратило допис до училиштата дека мора да се врати една стара пракса, која, како што вели, постоеше и покажуваше ефекти.

– А тоа е на големите и малите одмори да има дежурен наставник, а не дежурни ученици во ходниците, туку дежурни наставници, кои ќе водат грижа за настаните во училиштето, не само во ходниците и во дворот на училиштето – вели Јаневска.

- Advertisement -

Случајот со девојче од шесто одделение кое заврши на лекар и психијатар откако било горено со цигари понижувано од соученичките во паркот близу општината ја разбранува јавноста во април.

Министерката посочи дека она што се случило надвор од училиштето не е оправдување, дека се работи за ученици на одредено училиште и  дека наставниците мора да имаат увид во тоа како се однесуваат нивните ученици затоа што, како што рече, тоа е воспитно-образовен процес.

– Со овој допис ги задолживме дежурните наставници да бидат на видно место за кога ќе оди ДПИ во контрола да ги види. Се надевам дека ќе даде некаков ефект и оваа мерка што ја промовираме. Сега, дополнително, се спроведува и по прирачникот за справување со врсничко насилство и по закон. Оттука, и градоначалникот, и директорот, и наставниците треба да си ги спроведат своите обврски така како што е пропишано. МОН го прави она што треба да го направи. Оваа мерка е задолжителна и е испратена до сите училишта во државата – додаде Јаневска одговарајќи на новинарско прашање по доделувањето на државната награда „Гоце Делчев“ за остварувања во науката.