Уште една успешна трансплантација со коска од починат донор е извршена на Клиниката за ортопедија при Клиничкиот центар „Мајка Тереза“ во Скопје, втора во изминатово деноноќие, соопшти Министерството за здравство.
Трансплантацијата е извршена на 19-годишен пациент за корекција на деформитет на стапало како резултат на церебрална парализа.
– Во минатото корекцијата на деформитетот се правела со користење на дел од надворешната коска на потколеницата која се земала од пациентот. Притоа се појавувал дефект кој тешко се корегирал. Со користењето на коска од кадавер, оперативниот зафат трае многу пократко и не остава дефект на друго место кај пациентот, а и корекцијата е многу постабилна – соопшти Министерството.
Екипата која ја изврши трансплантацијата ја предводеа проф. д-р Зоран Божиновски со анестезиологот д-р Лилјана Ангелеска и асистенти д-р Теодора Божиновска и Кристина Јордановска, заедно со средно-медицинскиот кадар Менче Дојчиновска и Оливера Лазаревска.
– Експертизата и стручноста остануваат наш императив и силно сме фокусирани на нови методи и процедури во трансплантацијата – рече проф. д-р Билјана Кузмановска, национален координатор за трансплантација.
