Дебакл со историски размери, Македонија прими гол на секоја минута против Унгарија, ниту еден одговор

Ватерполо репрезентацијата на Македонија до 16 години доживеа понижувачки пораз од Унгарија со резултат 41:0 на турнирот Balkan Waterpolo Games 2026. Практично, на секоја минута од игра во мрежата на македонскиот тим влегувал по еден гол, а младите играчи не успеаа да дадат ниту еден, макар почесен погодок.

Резултатот сам по себе зборува повеќе од секој коментар, но вистинското прашање не е како се случи овој дебакл, туку колку долго уште ќе продолжи амaтеризмот во Македонската пливачка федерација да се прикрива зад пригодни изјави и прослави што немаат никаква врска со реалната состојба на теренот.

Додека соседите системски градат кадар, кај нас повторно останува отворено прашањето, каде беше министерот за спорт Борко Ристески, кој во јавноста често ветуваше крупни промени и резултати. Уште поранливо е податокот дека во тимот немаше ниту еден играч од Охрид или Струга, градови кои со децении се сметаат за расадник на пливачкиот и ватерполо спорт кај нас. Излегува дека народната изрека за жедните што не превезуваат преку вода одново си го наоѓа местото токму во македонскиот спорт.

- Advertisement -

Пораз од ваков калибар не смее да падне на грбот на младите спортисти. Тие се последните на кои треба да им се бара сметка. Одговорноста е на системот, на федерацијата и на институциите што со години носат одлуки, трошат средства и не даваат резултати.

Прашањето повеќе не е дали ќе изгубиме уште еднаш со поразувачки резултат, туку до кога институциите ќе продолжат да се лажат себеси дека сме на вистинскиот пат.

Ако ни резултат од 41:0 не е доволен аларм за итна реакција, тогаш проблемот одамна не е само во ватерполото. Проблемот е во целиот начин на кој се управува со македонскиот спорт.