Претставниците на Централната банка на САД (ФЕД) се загрижени за движењето на инфлацијата и влијанието што политиката на новоизбраниот претседател Доналд Трамп може да го има врз динамиката на намалување на каматните стапки.
На последната средба во декември, според американските медиуми, тие ги навеле како можни негативни влијанија врз американската економија промените во имиграциската и трговската политика.
По победата на изборите во ноември, Трамп најави планови за дополнителни царини за Кина, Мексико и Канада, како и за другите трговски партнери на САД, а освен тоа има намера да продолжи со дерегулација и масовни депортации.
Членовите на Федералниот комитет за отворен пазар (FOMC) изјавиле дека треба да се внимава кога станува збор за спроведувањето на плановите на Трамп.
Еден од врвните креатори на политика на Федералните резерви на САД Кристофер Валер на средба на Организацијата за економска соработка и развој во Париз, пак, изјави дека сè уште го поддржува намалувањето на каматните стапки оваа година, и покрај зголемената инфлација и изгледите за широко распространети царини под администрацијата на Трамп.
Валер очекува инфлацијата да се приближи до целта на ФЕД од 2% во наредните месеци. Тој смета дека поголемите увозни давачки веројатно нема да ја поттикнат инфлацијата оваа година.
-Мојата основна порака е дека верувам дека ќе бидат соодветни повеќе кратења. Ако, како што очекувам, тарифите немаат значителен или постојан ефект врз инфлацијата, веројатно нема да влијаат и на мојот став – -изјави Валер.
Тој не кажа колку кратења конкретно поддржува. Наместо тоа, тој рече дека претставниците на ФЕД на средбата во декември проектирале две намалувања оваа година.
Но, тој, исто така, истакна дека креаторите на политиката поддржале широк спектар на резултати, од никакви кратења до дури пет.
-Бројот на намалувања ќе зависи од напредокот кон намалување на инфлацијата – додаде тој.
Неговите забелешки се значајни бидејќи влијанието на царините е клучна вајлд-карта за економијата оваа година.
Валер, исто така, посочи дека е пооптимист за инфлацијата од многу инвеститори од Вол Стрит, кои сè повеќе очекуваат ФЕД да ја задржи својата стапка стабилна оваа година бидејќи покачените цени продолжуваат да се задржуваат.
-Верувам дека инфлацијата ќе продолжи да напредува кон нашата цел од 2% на среден рок и дека дополнителното намалување (стапката) ќе биде соодветно – рече Валер.
Додека инфлацијата беше постојана во последниве месеци – таа достигна 2,4% во ноември, според претпочитаната мерка на ФЕД – Валер тврдеше дека надвор од домувањето, што е тешко да се измери, цените се ладат.
Забелешките на Волер се спротивни на зголемените очекувања на Вол Стрит дека ФЕД можеби нема многу да ја намали основната стапка, оваа година. Во моментов е околу 4,3% по неколкуте намалувања минатата година од највисокото ниво во последните две децении од 5,3%. Финансиските пазари очекуваат само едно намалување на стапката во 2025 година, според цените на фјучерсите следени од CME Fedwatch.
