Четврта мобилизација на руските трупи оваа година; Кремљ ги негира проблемите

Рускиот претседател Владимир Путин потпиша указ за зголемување на бројноста на војската за 15.500 лица – четврти таков указ оваа година. „Во суштина, Русија веќе започна со дополнителна мобилизација, проширувајќи го опсегот на регрутирање во своите редови преку користење на различни методи. Исто така, планира да го зголеми бројот на странски државјани“, изјави украинскиот претседател Володимир Зеленски.

Рускиот претседател Владимир Путин потпиша указ за зголемување на бројноста на војската за 15.500 лица – четврти таков указ оваа година, пренесува „Еуроњуз“ (Euronews).

„Одобрената бројност на руските вооружени сили е утврдена на 2.441.630 лица, вклучително и 1.550.500 воени лица“, се наведува во указот, според информативниот портал.

- Advertisement -

Путин претходно потпиша документи за зголемување на бројот на трупите во март, јуни и јули. Така, од март, бројот на активни војници е зголемен за 47.860. Една од причините би можеле да бидат сè поголемите загуби и на руската и на украинската страна во војната од големи сериозни размери. Сепак, Путин не наведе конкретна причина за одлуката.

Темпото на напредување на руските трупи на бојното поле е забавено оваа година, бидејќи масовната употреба на беспилотни летала го прави брзото движење на големи воени единици речиси невозможно. Според „Еуроњуз“, во последните недели се појавија извештаи за украински пробиви долж одредени делови од линијата на фронтот.

Во август, украинските разузнавачки служби објавија дека Москва планира да мобилизира до 300.000 луѓе оваа година за испраќање на фронтот, а ист број би следел и следната година.

Сепак, врз основа на податоците за мерките што ги подготвуваат руските власти на терен, многу аналитичари предвидоа нов бран на мобилизација оваа есен, веднаш по парламентарните избори. Овие предвидувања предизвикаа широка паника меѓу Русите. Путин ги отфрли гласините како „целосни глупости“.

Кремљ тврдеше дека потребите на руските вооружени сили ќе бидат задоволени преку војници по договор и доброволци, додека независните аналитичари тврдеа дека бројот на нови регрути од овие групи продолжува да опаѓа, и покрај ветувањата за значителни финансиски награди. Како што претходно беше објавено, во последните месеци во Белорусија на интернет кружи сè поголем број огласи со кои Белорусите се повикуваат да ѝ се приклучат на руската војска. За возврат, овие огласи ветуваат исплати во вредност од десетици илјади евра, високи плати и руско државјанство. „Во суштина, Русија веќе започна со дополнителна мобилизација, проширувајќи го опсегот на регрутирање во своите редови и користејќи различни методи за таа цел. Таа исто така планира да го зголеми бројот на вклучени странски државјани; затоа, важно е владите на земјите од кои Русија регрутира кадар да се спротивстават на тоа“, изјави украинскиот претседател Володимир Зеленски во видео-обраќање на социјалната мрежа „Икс“ (X).

Зеленски додаде дека располага со нови информации кои укажуваат оти Северна Кореја се подготвува да испрати дополнителни 10.000 војници во Русија.