Четири лица загинаа, а 30 беа повредени кога воз излета од шините во Пакистан

Патнички воз излета од шините рано утринава во централниот дел на Пакистан, при што загинаа четири лица, а 30 беа повредени, соопштија полицијата и портпаролот на „Пакистански железници“.

Возот сообраќал од јужниот пристаништен град Карачи кон северозападниот град Пешавар кога излетал од шините во местото Шер Шах, во провинцијата Пенџаб, изјави портпаролот на железницата.

Спасувачките екипи извлекле четири тела и ги евакуирале повредените од 14-те вагони на возот, додаде тој.

- Advertisement -

Повредените се пренесени во болници.

Претседателот на Пакистан, Асиф Али Зардари, и премиерот Шехбаз Шариф изразија сочувство до семејствата.

Железничките несреќи се релативно чести во Пакистан, каде што железничкиот систем со децении се соочува со недоволни инвестиции и застарени пруги и системи за сигнализација, пренесува АП.

Во 2023 година, 10 вагони од патнички воз излетаа од шините во јужен Пакистан, при што загинаа 30 лица, а повеќе од 90 беа повредени.