Бројот на жртвите од двата силни земјотреси што ја погодија Венецуела драматично се зголеми

Бројот на жртвите од двата силни земјотреси што ја погодија Венецуела драматично се зголеми. Според најновите информации, најмалку 164 лица загинаа, а 971 се повредени, додека спасувачките екипи и натаму водат трка со времето во обид да пронајдат преживеани под урнатите згради.

Двата земјотреси со јачина од 7,2 и 7,5 степени по Рихтер ја погодија земјата во средата вечер, во интервал од само една минута, предизвикувајќи една од најтешките природни катастрофи во Венецуела во последните повеќе од сто години.

Во меѓувреме, властите соопштија дека се регистрирани околу 30 последователни потреси (афтершокови), а дел од погодените подрачја сè уште не се целосно пребарани, поради што постои можност бројот на жртви дополнително да расте.

- Advertisement -

Најкритична е состојбата во крајбрежната држава Ла Гваира, северно од Каракас, каде што се урнати десетици станбени и деловни објекти. Вршителката на должноста претседател Делси Родригез ја прогласи областа за „зона на катастрофа“ и најави дека таму се пренасочуваат спасувачки тимови од целата земја.

Телевизиските снимки прикажуваат спасувачи кои со тешка механизација и специјална опрема ги расчистуваат урнатините, додека семејства очајно ги бараат своите најблиски. Меѓу ретките добри вести е спасувањето на три деца, кои биле извлечени живи од урнатините во Ла Гваира, иако биле целосно покриени со прашина.

Паника владееше и во главниот град Каракас. Илјадници жители во страв ги напуштија своите домови и ноќта ја поминаа на улиците, во автомобили, паркови и метро-станици, плашејќи се од нови потреси. Во многу делови од градот беа прекинати снабдувањето со електрична енергија, мобилните комуникации и испораката на природен гас.

Сериозно е оштетен и меѓународниот аеродром „Симон Боливар“, кој привремено беше затворен, а наставата во училиштата е прекината. Дел од училишните објекти ќе бидат претворени во привремени засолништа за населението.

Земјотресите биле почувствувани далеку надвор од границите на Венецуела – во северна Колумбија, како и во бразилската Амазонија, на речиси 1.700 километри од Каракас. Првично беа издадени и предупредувања за можно цунами, но тие подоцна беа повлечени.

Властите предупредуваат дека конечниот биланс најверојатно нема да биде познат уште неколку дена, бидејќи постои страв дека под урнатините сè уште има голем број затрупани луѓе.

Во меѓувреме, започна да пристигнува и меѓународна помош. Соединетите Американски Држави најавија испраќање спасувачки тимови, медицинска опрема и хуманитарна помош, а поддршка понудија и Мексико, Ел Салвадор, Катар, Еквадор, Индија и многу други земји.

Иако Венецуела се наоѓа во близина на неколку тектонски раседи, вакви силни земјотреси се исклучително ретки. Според сеизмолозите, станува збор за едни од најмоќните потреси што ја погодиле земјата во повеќе од еден век.