Британското кралско семејство уште еднаш покажа како изгледа раскошот на највисоко ниво

Британското кралско семејство уште еднаш покажа како изгледа раскошот на највисоко ниво. Кралот Чарлс Трети во вторникот вечерта (20.10) приреди свечен државен банкет во замокот Виндзор во чест на оманскиот султан Хајтам бин Тарик Ал Саид. На гламурозната вечера присуствуваа најистакнатите членови на кралското семејство и бројни угледни гости.

Покрај елегантните изданија на членовите на кралското семејство, внимание привлекоа и неверојатните детали од свечената вечера во замокот Виндзор. Кралот Чарлс Трети и кралицата Камила го пречекаа султанот на Оман, Хајтам бин Тарик Ал Саид, на свечена вечера на која присуствуваа 160 гости, меѓу нив и принцот Вилијам и принцезата Кејт.

Ништо помалку импресивно не било ниту менито, внимателно осмислено за оваа посебна пригода. За предјадење, гостите добиле шкотски шкампи и рак од Корнвол, послужени со авокадо, целер и бистра доматна супа.

- Advertisement -

За главно јадење бил послужен фазан од имотот Виндзор, подготвен со зачинети дуњи, полнета зелка, компири и сос од дижонски сенф. Вечерата завршила со елегантниот десерт „Бејкд Алјаска“ (Baked Alaska) – сладоледен десерт прекриен со запечена пена од белки, подготвен со сливи од Балморал и сладолед со мед од кралскиот имот Виндзор.

Изборот на локални состојки и сезонски производи е дел од пристапот со кој кралската кујна го претставува британското гастрономско наследство.

На гостите им биле понудени и врвни вина, меѓу кои особено се издвојувало „Шато Марго“ од 1979 година, како и шампањското „Taittinger Comtes de Champagne“ од 1998 година. Интересно е што оманскиот султан, за време на свечената здравица, наместо вино избрал безалкохолен пијалак.

Посебно внимание привлекол пијалакот по вечерата. Наместо вообичаен коктел, готвачите се инспирирале од оманската традиција на „кахва“, ароматично арапско кафе со зачини, кое се споделува како знак на гостопримство. Во Виндзор оваа идеја ја приспособиле со британски чаеви и мед од кралскиот имот. Гостите можеле да изберат ладен чај „Ерл греј“ со урми, ладен чај со нане и роза или топол чај со кардамон и мед.

Раскошот бил видлив и во поставувањето на трпезата во салата „Сент Џорџ“. Махагонската маса била долга 47 метри и украсена со стотици сезонски цвеќиња, меѓу кои далии, астри и црвени лилјани. Во центарот се наоѓал позлатен свеќник со мотивот на Свети Ѓорѓи и змејот, околу чија основа биле поставени калинки од градината на замокот. Плодовите потекнуваат од дрво засадено пред повеќе од 50 години од покојниот принц Филип.

Кралската гозба не била само демонстрација на луксуз, туку и начин да се спојат традициите на двете земји. Од локалните британски состојки до пијалакот инспириран од оманското гостопримство, секој детаљ бил осмислен за да ја одбележи државната посета – прва посета на омански султан на Велика Британија по 44 години.

Раскошната атмосфера била надополнета со цветни аранжмани направени од сезонско цвеќе, рачно набрано во градините на Бакингемската палата, замокот Виндзор и градината Савил, која е дел од паркот Виндзор Грејт.

Посебна приказна бил и музичкиот дел од свеченоста. Иако многумина на кралски банкет би очекувале исклучиво класична музика, организаторите подготвиле интересна комбинација од традиционални композиции и современи хитови.

На репертоарот, покрај делата на Бах, Хендл и Вивалди, се нашле и песната „Shallow“, позната во изведба на Лејди Гага и Бредли Купер, „Clocks“ на групата „Колдплеј“ и „A Thousand Years“ на Кристина Пери. Била изведена и музика од популарни филмови и мјузикли, меѓу кои „La La Land“ и „The Greatest Showman“.

За музичката придружба бил задолжен гудачкиот оркестар на војвотката од Единбург, под диригентство на капетанката Александра Никсон, а свечената атмосфера дополнително ја збогатиле традиционалните шкотски гајдаџии.

Меѓу гостите биле и оманската атлетичарка Мазун Ал Алави и морепловецот Мохсин Ал Бусаиди.