БРИТАНСКИОТ ПРЕМИЕР ГО УБЛАЖИ РЕЧНИКОТ КОН ТРАМП

Британскиот премиер Енди Барнам ги ублажи своите претходни критики упатени кон американскиот претседател Доналд Трамп, во пресрет на нивната денешна средба во Њујорк.

Во разговор со новинарите за време на летот кон САД, Барнам рече дека е време тие изјави да се остават зад себе, истакнувајќи дека политичарите даваат различни изјави во текот на кариерата, но дека фокусот треба да се стави на актуелните односи.

– Политичарите кажуваат разни работи во текот на кариерата, но сега е важно да се фокусираме на моментот во кој се наоѓаме – рече тој.

- Advertisement -

Барнам во минатото беше остар критичар на Трамп. Во 2017 година тој изјави дека нема да се сретне со него „од принцип“, повикувајќи се на „омраза и екстремистички материјали“ што американскиот претседател ги објавуваше на интернет. По упадот на приврзаниците на Трамп во американскиот Капитол во јануари 2021 година, Барнам порача дека „секој британски политичар што му посветувал внимание на Трамп треба да се срами во овој момент“.

Британскиот премиер откри и дека во нивниот прв телефонски разговор се осврнал на претходната изјава на Трамп во која тој го нарекол Барнам „градоначалник на некој град“.

– Му реков на претседателот во нашиот прв телефонски разговор: ‘Господине претседателе, Манчестер не е некој град. Ова е Манчестер’. Затоа, правилно е да се пошегуваме за тоа и да продолжиме понатаму – рече Барнам.

На прашањето дали може да му верува на Трамп, Барнам нагласи дека односите меѓу Велика Британија и САД се подлабоки од поединечните политички несогласувања.

– Кога ќе ја преземете оваа функција, сфаќате колку е длабока оваа врска. Ние им веруваме на нашите сојузници. Секако дека им веруваме – рече тој, а на директното прашање дали лично му верува на Трамп, одговори потврдно.

Барнам и Трамп се среќаваат денеска во Њујорк, на маргините на Генералното собрание на ОН.