Американскиот рапер собра на концерт повеќе од 22.000 „ќелавци“

Американскиот музичар Питбул, познат по хитовите „Fireball“, „Give Me Everything“, „On the Floor“ и многу други, постави необичен Гинисов рекорд организирајќи најголем собир на луѓе со ќелави капи на еден концерт.

На концертите на Питбул веќе со години постои необична традиција. Неговите обожаватели, најчесто жени, се облекуваат како него – носат бели кошули, црни вратоврски, темни панталони и очила за сонце, а на главите ставаат специјални капи поради кои изгледаат како да се ќелави, исто како славниот музичар.

Токму така изгледал и концертот што Питбул го одржа минатата недела во Хајд Парк во Лондон. На настанот пристигнале дури 22.141 обожаватели со ќелави капи, што било доволно за нов светски рекорд.

- Advertisement -

Големото достигнување на сцената му го соопштил водителот Грег Џејмс, кој и самиот носел ќелава капа. Питбул, чие вистинско име е Армандо Кристијан Перез, останал без зборови кога слушнал дека официјално влегол во Гинисовата книга на рекорди.

– Леле, успеавме, ќелавци! Во овој момент навистина немам зборови. Но, едно секогаш им го кажувам на луѓето на моите концерти – кога ќе ја ставите таа ќелава капа, знаете дека ќе си поминете подобро од кога било во животот. А сега и официјално сте дел од Гинисовата книга на рекорди. Одиме! – изјавил музичарот.

За рекордот да биде признат, посетителите морале строго да ги почитуваат правилата. Капата требало цврсто да стои на главата, косата целосно да биде скриена под неа, а учесниците морале да стојат на точно определено место и да ја носат капата најмалку една минута.

Питбул ја започна својата кариера во раните 2000-ти години и оттогаш има продадено повеќе од 25 милиони албуми и над 100 милиони синглови ширум светот.

Тој е еден од најуспешните латино музичари на својата генерација, а неговите песни редовно ги освојуваат светските топ-листи и денес.