Министерство за спорт, „Маменко“ и пензија од 60.000 денари: Како се плива во суво во Северна Македонија

Северна Македонија има и Министерство за спорт. Да, добро прочитавте. Постои, има кабинет, има возила, има протокол. Само што спортот, особено пливањето, повеќе личи на дисциплина што се практикува на сува земја, со многу говор и со малку вода.

Земја со езера, без пливачи

Имаме Охрид, Преспа, Дојран, Матка и безброј акумулации. Сепак, пливачките дисциплини се во изумирање. Тоа е како да сте Саудиска Арабија и да увезувате нафта. Вистински подвиг на системот: Со толку вода наоколу, да не успее да се направи ни базен што ќе работи цела година.

Пливачката федерација: рекорд во блокада

Во светски рамки тешко може да се најде блокирана федерација како нашата Пливачка федерација на Северна Македонија. Другите федерации се борат за медали, а нашата за кворум. Единствена дисциплина во која сме неоспорни фаворити е пливање против струја на сопствената бирократија.

„Маменко“: од критичар до колега

- Advertisement -

Според кулоарските приказни, „Маменко“, кој во одредени кругови се потпишувал и како советник за спорт на премиерот Мицкоски, некогаш ги критикувал времињата на ВМРО-ДПМНЕ и Никола Груевски и, како што се шепоти, фрлал и по некој камен кон новото раководство. Времето минува, каменчињата се враќаат во шумата, а на масата стигнува нов работен ангажман во Министерството за спорт.

Образложението, пак според кулоарот, е трогателно: „Бил греота, немал за живот.“ Тука сатирата застанува и почнува аритметиката. Ако националната пензија навистина надминува 60.000 денари, во држава каде илјадници пензионери се борат со многу помалку, прашањето е очигледно. Каде е границата на „немање за живот“ и кој ја утврдува? Дали ќе воведеме „минимална егзистенција за кадар“ како посебна буџетска ставка?

Кадровска логика: пензионерите во акција

Така се дефинира спортска политика во нашиот случај: кога не можеш да најдеш млад тренер за базен, најди искусен кадар,манипулатор за кабинет. Спортистите чекаат инфраструктура, а министерството носи нова столица. Столиците, за разлика од пливачите, никогаш не фалат.

Што му треба на македонскиот спорт?

• базени што работат, а не само се отвораат со лента,
• федерации што функционираат, а не само постојат на хартија,
• јасни критериуми за ангажмани, наместо „кулоарски образложенија“,
• транспарентност: кој, колку, зошто и по која основа.

——————————————————————————————————————————————————————————–

Нашата држава има многу езера, а недостасуваат пливачи, и тоа не е случајно. Додека спортот чека реформи, министерството за спорт се грижи да не остане ни еден заслужен кадар „без живот“. Ако ова е „процут“ што го најавуваат, да ни кажат во која дисциплина се натпреваруваме. Од тоа како се плива, за сега гледаме само дека се плива по течението.

Сашо Денеосвски