ПЛЕНКОВИЌ ОЧЕКУВА НАПРЕДОК ОД ЦРНА ГОРА ВО ШЕСТЕ ПРЕОСТАНАТИ БАРАЊА

Премиерот на Хрватска Андреј Пленковиќ очекува Црна Гора да постигне напредок во решавањето на отворените прашања со Хрватска, нагласувајќи дека за тоа е неопходна политичка волја од Подгорица.

Пораката ја упати по средбите со претседателот на Европскиот совет, Антонио Кошта, и претседателката на Европската комисија, Урсула фон дер Лајен, во пресрет на неформалниот самит на Европската унија во Даблин.

„Очекуваме црногорските власти да постигнат напредок во решавањето на прашањата поврзани со почитувањето на европските вредности и принципите на добрососедските односи, во рамките на поглавјата 23 и 31. Во тој поглед, клучна е политичката волја од црногорска страна“, објави Пленковиќ на платформата Икс.

- Advertisement -

На средбите се разговарало за проширувањето на ЕУ и за намерата на Црна Гора да ги затвори пристапните преговори до крајот на 2026 година.

Хрватскиот премиер нагласил дека неговата земја го поддржува проширувањето, но врз основа на исполнувањето на критериумите за членство.

„Хрватска ја поддржува европската перспектива на соседните земји и се залага за продолжување на процесот на проширување врз основа на индивидуалните заслуги, спроведувањето на реформите и исполнувањето на сите критериуми за членство“, наведе тој.

Пленковиќ потсети дека Загреб досега го поддржал затворањето на 23 преговарачки поглавја на Црна Гора.

„Ја појаснив позицијата на Хрватска, која остана конструктивна во текот на целиот процес на пристапување на Црна Гора. Досега поддржавме затворање на 23 преговарачки поглавја“, истакна хрватскиот премиер.

Хрватска во средината на октомври официјално доставила 8 барања до Црна Гора и до земјите членки на Европската унија.

Нивното исполнување Загреб го поврзува со завршувањето на пристапните преговори и идното членство на Црна Гора во ЕУ.

Според доставените информации, две од осумте барања веќе се исполнети, додека шест остануваат отворени.

Шест од првичните барања се однесуваат на поглавјето 23, кое ги опфаќа правосудството и основните права.

Останатите две се поврзани со поглавјето 31, кое се однесува на надворешната, безбедносната и одбранбената политика.