ПРИНЦОТ ВИЛИЈАМ ГО СЛЕДЕШЕ ДУЕЛОТ МЕЃУ АНГЛИЈА И ХРВАТСКА

Принцот Вилијам беше меѓу познатите гости на натпреварот меѓу Англија и Хрватска во Лигата на нации, одигран во четвртокот вечерта на лондонскиот стадион „Вембли“. Британскиот престолонаследник имаше и посебна улога пред почетокот на средбата – му врачи признание на капитенот на англиската репрезентација, Хари Кејн.

Поводот беше историскиот настап на Кејн, кој со 126. натпревар за Англија го надмина рекордот на легендарниот голман Питер Шилтон и стана фудбалер со најмногу настапи за машката репрезентација на земјата. Вилијам и Шилтон му врачија врамена репрезентативна дрес-маица со бројот 126, а Кејн доби признание и од Хрватскиот фудбалски сојуз, кое му го предаде Лука Модриќ.

По свеченоста на теренот, принцот се упати во свечената ложа, каде што го следеше натпреварот во друштво на претседателката на Англискиот фудбалски сојуз, Деби Хјуит.

- Advertisement -

Англија ја победи Хрватска со 2:1. Победата на домаќините им ја донесе токму Кејн, кој во 64. минута погоди од пенал и го одбележа рекордниот настап со гол. Со овој триумф Англија обезбеди пласман во четвртфиналето на Лигата на нации.

Вилијам е познат како голем љубител на фудбалот, а воедно е и покровител на Англискиот фудбалски сојуз. Затоа не е изненадување што присуствуваше на важниот натпревар, кој за англискиот капитен беше вечер за паметење.