ЃОКОВИЌ ЌЕ ГО ОСВОЈУВА МАЈАМИ СО ОБЛАКОДЕР ОД 320 МЕТРИ

Српскиот тениски ас Новак Ѓоковиќ влегува во светот на ултралуксузното угостителство преку проект што предвидува изградба на облакодер висок 320 метри во Мајами. Српскиот тенисер ќе соработува со компанијата „Аман груп“ во развојот на новиот бренд „АТМА“, кој ќе ги обедини луксузното сместување, спортот, здравјето и долговечноста, пишува српскиот портал Нова.рс.

Облакодерот ќе се издигнува во елитната населба Брикел, на брегот на заливот Бискејн. Покрај хотелскиот дел, комплексот ќе има луксузни станови, од еднособни апартмани до пентхауси со шест соби.

Посебно место ќе заземаат затворените терени за тенис и падел, со панорамски поглед кон Мајами. Тие ќе можат да се користат во текот на целата година, независно од временските услови.

- Advertisement -

Предвиден е и спа и медицински велнес-центар со површина од 11.500 квадратни метри. Просторот ќе располага со современа опрема за закрепнување на мускулите, подобрување на подвижноста и регенерација на телото.

Ѓоковиќ ќе учествува во креирањето програми за исхрана, долговечност и спортови со рекети. Неговата соработка со компанијата започнала во 2024 година, кога станал глобален партнер за велнес.

„Во текот на мојата кариера научив дека вистинските резултати се засноваат на рамнотежа. Тренингот, закрепнувањето, исхраната и менталната благосостојба мора да функционираат во хармонија за да се обезбедат долговечност и траен успех“, се наведува во изјавата на Ѓоковиќ што ја пренесува Нова.рс.

Името „АТМА“ потекнува од санскрит и значи „дух“ или „вистинско јас“.

За архитектурата на облакодерот е задолжено студиото „ШОП архитектс“, кое предвидело фасада со впечатливи закривени линии. Ентериерот ќе го уредува „Студио Паоло Ферари“.

Една од необичните карактеристики ќе биде осветлувањето приспособено на биолошкиот часовник на станарите. Светлината ќе се менува во согласност со природниот дневен ритам, со цел да го подобри одморот и квалитетот на спиењето.

Комплексот ќе содржи и ресторани, барови со музика во живо и простори за културни настани. Завршувањето на изградбата е планирано за 2031 година.