Битолчанец доби 8 дена притвор по второто приведување

Двапати во рок од два дена полицијата го затекнала истиот 29-годишен битолчанец како управува автомобил под дејство на алкохол. И покрај тоа што на 7 ноември бил лишен од слобода откако му биле измерени 3,23 промили алкохол во крвта, два дена подоцна повторно седнал зад воланот, овојпат со уште повисоко ниво на алкохол – 3,50 промили.

Првиот случај се случил на 7 ноември, околу 21:30 часот, на паркингот кај спортската сала „Боро Чурлевски“ во Битола. Полициски службеници го сопреле „мерцедесот“ со битолски регистарски ознаки што го управувал Х.Ј. и утврдиле дека вози под дејство на алкохол. Алкотестот покажал 3,23 промили, по што бил лишен од слобода.

Но, на 9 ноември, во 2:41 часот, истиот возач повторно бил запрен од полицијата, овојпат на улицата Партизанска во Битола. Повторно управувал „мерцедес“ со битолски регистарски ознаки, а проверката покажала дека има 3,50 промили алкохол во крвта.

- Advertisement -

Од СВР Битола информираат дека станува збор за истото лице, кое во рок од два дена двапати било лишено од слобода поради возење под дејство на алкохол. На 29-годишникот му е одреден притвор во траење од осум дена.