Нетанјаху секој ден разговара по телефон со Трамп, барајќи од него да започне нова воена офанзива против Иран

Израелскиот премиер Бенјамин Нетанјаху секој ден разговара по телефон со американскиот претседател Доналд Трамп, барајќи од него да започне нова воена офанзива против Иран, објави „Фајненшл тајмс“, повикувајќи се на извори запознаени со разговорите.

„Нетанјаху му се јавува секој ден за да го поттикне да ја продолжи војната. Оние кои не сакаат војна во и надвор од Белата куќа се обидуваат да се борат против тоа“, рече еден од изворите.

Истиот извор нагласува дека регионалните лидери го повикуваат Трамп да не го ескалира конфликтот и да им даде приоритет на преговорите.

- Advertisement -

Трамп наводно ги споменал ставовите кон своите сојузници од Заливот по состанокот со катарскиот премиер Мохамед бин Абдулрахман Ал Тани, кој се обидува да посредува за дипломатски крај на конфликтот меѓу САД и Иран.

„Катар, Саудиска Арабија, ОАЕ, Бахреин, Кувајт и други би претпочитале статус кво“, напиша Трамп на мрежата Трут соушл, објаснувајќи дека во моментов дава приоритет на одржувањето на економската блокада на Иран пред започнувањето нова воена офанзива.

Американскиот претседател, Доналд Трамп, синоќа изјави дека смета оти војната во Иран „практично е завршена од воен аспект“.

– Војната со Иран практично е завршена од воен аспект. Ние само ја одржуваме статус-кво состојбата – изјави Трамп во Белата куќа по средбата со катарскиот премиер.

Американскиот претседател додаде дека Иран е „обезглавен“, но посочи дека и натаму бара начин да обезбеди трајно решение со кое ќе се неутрализира нуклеарната програма на Техеран.

– Во овој момент не изгледа дека има голема потреба од воени дејствија. Но, подготвени сме да дејствуваме доколку се промени која било околност – рече Трамп. Тој повтори дека смета оти конфликтот со Техеран ќе заврши наскоро.

Во меѓувреме, претседателот на Врховниот совет за национална безбедност на Иран, Мохсен Резаи, изјави дека Вашингтон треба да „престане да шири лажни вести за непостоечки преговори“ и дека е време да ги прифати седумте услови што ги поставува Иран.