Лекар открива пет навики што можат да помогнат при анксиозност

Одржувањето на менталното здравје може да биде предизвик, а патот до стручна помош често е долг. Поради тоа, многу луѓе бараат едноставни и брзи методи за самопомош.

Лекарот од општа пракса и телевизиски експерт за здравје, д-р Амир Кан, наведува пет чекори за подобрување на менталната состојба и ублажување на анксиозноста, пренесува Express.co.uk.

Д-р Кан, познат по своите гостувања во британските емисии „Лорејн“ (Lorraine) и „Добро утро Британија“ (Good Morning Britain), ја нагласува важноста од преземање мерки кога анксиозноста ќе стане преголем товар.

- Advertisement -

„Одредено ниво на анксиозност е нормално, но кога таа почнува да влијае врз квалитетот на вашиот живот, време е да побарате помош“, вели д-р Кан.

„Разговарајте со некого. Постојат онлајн ресурси, здравствени работници, терапии преку разговор, па дури и лекови, доколку е потребно. Понатаму, постојат чекори што сите можеме да ги преземеме за да го подобриме нашето ментално здравје“, додава тој.

Физичка активност за рамнотежа на хемијата во мозокот
Првата препорака е физичка активност. Бројни студии потврдуваат дека вежбањето има широк спектар на позитивни ефекти врз умот.

„Зголемувањето на срцевиот ритам ја менува хемијата во мозокот, создавајќи повеќе простор за супстанции што се борат против анксиозноста – како што се серотонин и ендоканабиноиди“, објаснува д-р Кан.

Серотонинот често се нарекува хемикалија за „добро чувство“. Тој пренесува сигнали од мозокот низ целото тело и игра клучна улога во регулирањето на расположението, сонот и варењето. Ендоканабиноидите имаат слична функција.

Влијанието на алкохолот и пушењето
Исто така, постојат многу докази за штетните ефекти на алкохолот и пушењето врз менталното здравје. Д-р Кан напоменува дека прекумерното консумирање алкохол може да ги наруши хемиските процеси што го регулираат расположението.

„Супстанциите што се наоѓаат во тутунскиот чад можат да влијаат врз мозочните патишта поврзани со анксиозноста и паничните нарушувања“, додава д-р Кан.

Дајте приоритет на квалитетниот сон
Многу луѓе се свесни колку подобро се чувствуваат по добар ноќен сон, а д-р Кан истакнува дека научните докази ја потврдуваат неговата важност.

„Направете го квалитетниот сон приоритет“, советува тој. „Тоа значи спиење од седум или повеќе часа. Повеќекратно е докажано дека ова помага во намалување на нивото на анксиозност“, додаде д-р Кан.

Исхраната може да влијае на расположението
Начинот на кој се храниме исто така може да влијае на нашето ментално здравје. Истражувањата покажаа дека мозокот користи аминокиселини од протеините за производство на невротрансмитери, како што е допаминот, додека кофеинот и храната што предизвикува нагли скокови на шеќерот во крвта можат негативно да влијаат на расположението.

„Хемикалиите и адитивите во високо преработената храна кај некои луѓе можат да предизвикаат промени во расположението. Затоа, пијте многу вода и консумирајте доволно овошје и зеленчук, протеини со мал процент на масти и сложени јаглехидрати“, објасни д-р Кан.

Дишење, медитација и престој во природа
Последната препорака се однесува на техниките за релаксација. „Докажано е дека длабокото дишење, медитацијата и престојот во природа го намалуваат нивото на анксиозност“, рече д-р Кан.

На крајот, тој им порача на сите што се загрижени за своето ментално здравје да побараат совет од квалификуван здравствен работник, пренесува Index.hr.