СВЕТОТ НЕМА ДА ПОСТИГНЕ НУЛА ЕМИСИИ ДО 2050 ГОДИНА

Светот е на пат да ја промаши целта за постигнување климатска неутралност до 2050 година, покажуваат пресметките на осигурителната компанија „Алијанц“ објавени денеска.

Доколку се одржи сегашното темпо планетата како целина би можела да достигне нето-нула емисии до 2064 година, додека Европската Унија би ја постигнала целта до 2057 година, според индикаторот на компанијата за зелена транзиција.

Ограничувањето на глобалното затоплување на 1,5 степен Целзиусов – како што беше договорено според Парискиот климатски договор од 2015 година – ќе биде речиси невозможно, заклучуваат економистите.

- Advertisement -

Бројките се засноваат на податоци за производство на енергија од 64 земји кои се одговорни за поголемиот дел од глобалните емисии на стакленички гасови.

Кина и понатаму е убедливо најголемиот светски емитер на стакленички гасови со удел од 30 проценти во глобалните емисии, по што следат САД со 11 отсто, според „Алијанц“.

ЕУ останува лидер во намалувањето на емисиите на јаглерод со удел од 6 отсто, но темпото на намалување е забавено, се наведува во извештајот.

Иако климатските акции никогаш не биле политички приоритет во многу земји, а САД се оддалечија од своите климатски цели под претседателот Доналд Трамп, студијата сугерира дека 56 од 64-те земји постигнале напредок во постапното напуштање на нафтата, гасот и јагленот и дополнително ги намалиле емисиите.

Како дополнителен позитивен аспект, уделот на обновливите извори во глобалното производство на енергија минатата година достигна 33,5 проценти, надминувајќи го јагленот (33,2 отсто) за првпат во историјата – развој што економистите на „Алијанц“ го припишуваат на војната во Иран, која предизвика нагло покачување на глобалните цени на нафтата и гасот.

Војната со Иран, што САД и Израел ја почнаа во февруари, доведе до намалување на потрошувачката на фосилни горива и зголемена продажба на електрични автомобили и соларни панели, наведуваат тие.

Емисиите на ЦО2 дури би можеле да се намалат за 0,5 проценти оваа година, предвидува „Алијанц“.

Како и другите големи осигурителни групации, „Алијанц“ спроведува сопствени економски истражувања, со оглед на тоа што индустријата има директен интерес за дејствување против климатските промени.

Податоците за побарувањата за оштети покажуваат дека глобалното затоплување оди рака под рака со зголемувањето на штетите од природни катастрофи како бури и поплави на долг рок.