Франција и Британија ќе раководат со вежбата „Коалиција“ во Полска

Британските и другите европски трупи би можеле да возвратат на руските сили доколку бидат нападнати за време на евентуалното распоредување во Украина како мировници по прекинот на огнот, изјавија западни претставници, објави Гардијан.

Планираните англо-француски стабилизациски сили би работеле во одбранбен капацитет и нема да се потпираат на американските системи и технологијата, вклучувајќи ја и сателитската мрежа „Старлинк“, изјавија тие.

Деталите беа објавени откако Велика Британија и Франција ги почнаа подготовките за воената вежба „Коалиција“, што ќе се одржи во Полска подоцна овој месец.

- Advertisement -

Министерството за одбрана во Лондон соопшти дека стотици британски војници и борбени авиони на Кралските воздухопловни сили (РАФ) ќе учествуваат во голема мултинационална воена вежба во Полска за подготовка за потенцијален мир во Украина.

Обединетото Кралство и Франција заеднички ќе раководат со вежбата „Коалиција“ во која се вклучени 2.800 воени сили од 11 нации, со цел да се обезбеди подготвеност на НАТО силите за да ѝ пружат безбедносни гаранции на Украина откако ќе заврши војната.

Вежбата ќе се одржи од 9 до 22 ноември и ќе биде прва голема воена вежба спроведена од Мултинационалните сили за Украина (МНФ-У), односно, од военото крило на Коалицијата на подготвените.

Вежбата ќе симулира преместување на трупи и снабдување со ресурси, како што се храна и гориво, а беше договорена на самитот на Коалицијата на подготвените во јули.

Околу 300 британски војници ќе земат учество, при што припадници од 7-та бригада на копнената армија, познати како „Пустински стаорци“, ќе увежбуваат клучни логистички движења, додека авионите и авиотанкер ќе изведуваат прелети. Борбените авиони ќе симулираат како би му пружиле сигурност на комерцијалното воздухопловство откако повторно ќе се отвори украинскиот воздушен простор.

– Оваа вежба покажува дека Обединетото Кралство презема одговорност, рамо до рамо со Франција и нашите сојузници, за да се подготви за денот кога ќе дојде мирот во Украина. Ова не е хипотетички план, тоа се реални сили, подготвени да ѝ помогнат на Украина откако борбите ќе престанат – изјави британскиот министер за одбрана Вес Стритинг.

Тој нагласи дека „безбедноста на Украина наша е безбедност и ние ќе стоиме со нив во текот на целото потребно време“.

Британскиот генерал-потполковник Том Бејтман, кој командува со МНФ-У, изјави дека вежбата ќе покаже дека Мултинационалните сили за Украина се реални, способни и брзо распоредливи сили кои претставуваат сериозна посветеност од нациите на Коалицијата на подготвените кон долгорочната стабилност и безбедност на Украина.

– МНФ-У ќе бидат сè поподготвени секој ден да ѝ дадат поддршка на Украина кога ќе завршат борбите, обезбедувајќи Вооружените сили на Украина да бидат во најсилната можна позиција за одвраќање на идна агресија – додаде тој.

Земјите кои учествуваат се Белгија, Естонија, Франција, Германија, Литванија, Холандија, Полска, Шпанија, Шведска, Турција и Обединетото Кралство.

Турските сили во Истанбул ќе увежбуваат поморско расчистување на мини со цел да се помогне во обновувањето на комерцијалната пловидба кон украинските пристаништа.