Генерален секретар на ОН: Новинарите ширум светот плаќаат висока цена само затоа што ја кажуваат вистината

Генералниот секретар на Обединетите нации (ОН), Антонио Гутереш, по повод Меѓународниот ден за ставање крај на неказнивоста за злосторствата врз новинарите, изјави дека и денес новинарите ширум светот плаќаат висока цена само затоа што ја кажуваат вистината.

„Медиумските работници имаат клучна улога: тие ја информираат јавноста и бараат одговорност од оние што се на власт. Сепак, тие често се изложени на вознемирување, надзор, правен прогон, физички напади и притворање“ – а во некои случаи дури и на тортура или смрт – „исклучиво затоа што си ја вршат својата работа“, истакна Гутереш во својата порака.

Според него, во текот на изминатата година животот го загубиле најмалку 34 новинари, а во зоните на конфликт, стапката на неказнивост се приближува до 100 отсто.

- Advertisement -

„Ваквата неказнивост нанесува поразителен удар – не само врз жртвите и нивните блиски, туку и врз секој од нас што се потпира на новинарите за да остане информиран и општествено ангажиран“, изјави Гутереш, додавајќи дека е време да се стави крај на „оваа скандалозна ситуација“.

Тој нагласи дека ништо не смее да ги спречи новинарите во вршењето на нивната професија, што претставува суштински предуслов за почитување на човековите права, демократијата и владеењето на правото. „Секој случај мора да се истражи, секој сторител да се изведе пред лицето на правдата, а нападите во онлајн просторот мора да престанат. Знаеме дека напредокот е можен“, додаде Гутереш.

Од воведувањето на Акцискиот план на Обединетите нации за безбедност на новинарите и прашањето за неказнивоста во 2012 година, стапката на неказнивост за ваквите злосторства во земјите што не се зафатени од вооружени конфликти е намалена од 94 на 77 отсто. Сепак, мораме да направиме повеќе, рече Гутереш.

„На овој Меѓународен ден за ставање крај на неказнивоста за злосторствата врз новинарите, бараме правда. Кога новинарите се цел на напади и се замолчуваат, цената ја плаќаат сите“, додаде генералниот секретар на ОН.