Француското обвинителство покрена истрага за обид за убиство откако врз полицајци биле фрлани Молотови коктели за време на немирите во Париз

Француското обвинителство покрена истрага за обид за убиство откако врз полицајци биле фрлани Молотови коктели за време на немирите во Париз.

Реакции предизвика снимка од судирите со демонстрантите во Париз во саботата, на која се гледа полицаец зафатен од пламен. Инцидентот се случил по повеќенеделните улични протести, во кои, според информациите, имало и повредени демонстранти.

Полицаецот, кој се здобил со изгореници на зглобот на ногата и полесни повреди на раката, за весникот „Figaro“ изјавил дека станувало збор за „исклучително софистицирана“ запалива направа.

- Advertisement -

Францускиот министер за внатрешни работи Лоран Нуњез фрлањето Молотов коктел врз полицискиот кордон го опиша како „обид за убиство“ и соопшти дека полицијата интензивно трага по сторителите.

Стотици илјади луѓе учествувале во главно мирни протести низ Франција во саботата. Тоа е последниот во низата протести што, од крајот на септември, главно ги предводат млади луѓе.

Тие бараат властите да реагираат поради високите трошоци за живот и лошата состојба на јавните услуги, особено во образованието.

Поради претходните судири и грабежи, илјадници полицајци биле распоредени низ целата земја во текот на викендот, а во некои градови бил употребен и солзавец.

Според податоците на француското Министерство за внатрешни работи, во саботата биле уапсени повеќе од 770 лица, што е околу половина од бројот на апсења една недела претходно.

Сепак, полицијата соопштила дека никој сè уште не е уапсен поради нападот врз полицаецот што бил снимен од камера, пренесе „AFP“.

Нападнатиот полицаец е припадник на Националната жандармерија, воена единица под надлежност на Министерството за внатрешни работи.

Тој изјавил дека неговата единица „ненадејно се соочила со неколку стотици непријателски расположени и добро опремени противници“.

Во интервју за „Figaro“, тој навел дека течноста употребена во нападот сè уште не е идентификувана, но дека запаливата направа „имала многу посилен ефект на горење од стандарден Молотов коктел“.

– Се соочивме со агресивни лица кои не беа демонстранти. Овие луѓе дојдоа со намера да им наштетат на оние што ја претставуваат државата – изјавил полицаецот.

Тој додал дека биле повредени уште 14 полицајци, дел полесно, а дел потешко, при што неколкумина биле погодени и со камења.

Неговата единица, како што навел, требало да биде надвор од должност, но итно била повикана поради протестите.

Организаторите на протестите, „Жолтите елеци“, тврдат дека десетици демонстранти биле тешко повредени за време на неодамнешните демонстрации и дека многумина биле погодени со „гранати“.

Франција привремено ја суспендирала употребата на еден вид шок-бомба на почетокот на октомври, откако 15-годишник останал без дел од шаката.

Сепак, весникот „Le Monde“ објави дека полицијата и натаму користи друг модел за време на следните протести.

Протести во текот на викендот се одржале и во Германија и Италија. Тие се дел од поширок бран демонстрации што во делови од Европа главно ги предводат млади луѓе.

Иако нивните барања се разликуваат од земја до земја, заеднички именител се високите трошоци за живот и состојбата на јавните услуги.