Мате Римац открива како му бил украден луксузен автомобил вреден неколку милиони евра

Луксузен „Бугати Широн“ (Bugatti Chiron), сопственост на претприемачот Мате Римац – проценет на околу три милиони евра – бил украден во Хрватска. Крадецот побегнал со возилото преку Словенија во Австрија, каде што полицијата го уапсила истиот ден. Римац тргнал во потера со својот „Порше“, но на крајот одлучил да не поднесува кривична пријава против осомничениот.

Во средата, во Хрватска бил украден луксузен „Бугати Широн“ што му припаѓа на хрватскиот претприемач Мате Римац, а чија вредност изнесува околу три милиони евра. Хрватската, словенечката и австриската полиција се вклучиле во потрагата и уште истиот ден го лоцирале возилото во Австрија. Зад воланот се наоѓал 36-годишен хрватски државјанин, кој ја признал кражбата, пренесува хрватскиот весник „24сата“.

Според австриската полиција, автомобилот – кој има загрепски регистарски таблички – бил украден во средата во близина на Загреб. Осомничениот го возел преку Словенија кон Австрија, преминувајќи ја границата кај Шентиљ. Според неофицијални информации на „24сата“, крајната дестинација на осомничениот била Германија.

- Advertisement -

Како што објасни Римац во видео објавено на Фејсбук, тој првично не ја забележал кражбата, бидејќи неговите автомобили често ги користат неговите колеги. За исчезнувањето на „Бугатито“ дознал дури откако некој забележал дека непознато лице управува со возилото. Римац тогаш одлучил лично да тргне во потера по осомничениот. Телеметриските податоци покажале дека украденото возило се движи кон Словенија. Тој седнал во својот „Порше 911“ и тргнал по крадецот, кој во тој момент веќе имал предност од околу еден час.

Бегството завршило истиот ден, нешто по 19:00 часот, кога австриската полиција го пронашла украдениот автомобил на бензинска пумпа покрај автопатот, во близина на Сајерсберг. Австриската полиција го уапсила мажот на самото место. Според нив, тој за време на испрашувањето целосно ја признал кражбата.

Подоцна, Римац се сретнал со осомничениот во полициската станица. Тој раскажа дека 36-годишникот објаснил оти дошол во компанијата барајќи работа; Откако го забележал автомобилот со клучевите внатре, тој одлучил да го одвезе. Римац истакна дека, поради чувството на безбедност во Хрватска, со години ги остава клучевите во своите вредни возила.

Римац нема да поднесе кривична пријава против осомничениот.
Сепак, Римац одлучи дека лично тој не сака да поднесе кривична пријава против осомничениот. „Се надевам дека со овој човек сè ќе биде во ред“, рече тој, додавајќи дека случајот сепак ќе биде процесуиран од надлежните органи. По налог на Јавното обвинителство во Грац, против осомничениот ќе биде поднесена кривична пријава. Австриската полиција веќе му го вратила украдениот автомобил на Римац, основачот и извршен директор на „Римац групацијата“ (Rimac Group) – во чии рамки влегува и компанијата „Бугати Римац“ (Bugatti Rimac).