Тешка повреда на ѕвездата на Оклахома

Победата на Оклахома Сити Тандер над Лос Анџелес Клиперс со 108:101 падна во сенка на тешката повреда на една од најголемите ѕвезди на тимот, Џејлен Вилијамс. Американскиот кошаркар беше изнесен од теренот на носилки, а сцените од завршницата ги потресоа играчите на двата тима и публиката во салата.

Драмата се случи на само една минута и 14 секунди пред крајот на натпреварот. Вилијамс тргна кон кошот, се обиде да заврши со забивање, а по контактот со противнички играч незгодно падна и ја повреди левата нога.

Медицинскиот персонал веднаш истрча на теренот. Повредениот зглоб му беше покриен со крпи, а на паркетот беа донесени носилки. Натпреварот беше прекинат околу пет минути, додека кошаркарите на двата тима во неверување ја следеа интервенцијата.

- Advertisement -

Некои од соиграчите на Вилијамс беа на работ на солзи. Додека го изнесуваа од теренот, кошаркарот, и покрај болката, со кренати палци ја поздрави публиката, која го испрати со аплауз.

Особено емотивен беше Шеј Гилџус-Александер, кој по натпреварот едвај ги задржуваше солзите.

– Едноставно ми е тешко поради него. Тој сака да игра и да се натпреварува. Таков е – изјави кошаркарот на Оклахома.

Засега нема официјална медицинска дијагноза, па не е потврдено дали станува збор за скршеница, иако првичните реакции укажуваат на сериозна повреда. Тренерот на Оклахома, Марк Дејно, најави дека повеќе информации за состојбата на Вилијамс се очекуваат по завршените прегледи.

Вилијамс веќе има настап на Олстар-натпревар и беше важен дел од шампионскиот состав на Оклахома во 2025 година. Сепак, и претходно имаше проблеми со повреди, поради кои пропушти значителен број натпревари минатата сезона.

Оклахома ја забележа победата, но радоста брзо беше заменета со загриженост за здравјето на еден од клучните играчи. Тимот веќе вечерва треба да го пречека Феникс Санс, но во центарот на вниманието останува прашањето колку сериозна е повредата на Вилијамс и колку долго ќе отсуствува од терените.