НАПАДНАТА Е МАЈКАТА НА АЛЕКСАНДАР ВУЧИЌ

Ангелина Вучиќ, мајката на носителот на листата на „Единствена Србија“, денес била нападната пред гласачкото место, јавуваат српските медиуми.

Според извештаите, таа била физички и вербално нападната, а нејзината торба со намирници била украдена. Инцидентот е пријавен во полиција, која соопшти дека го уапсила Н.М.(28) кој е  осомничен за нападот и е задржан 48 часа поради сомнение за кривично дело разбојништво.

– Во наведениот рок осомничениот ќе биде сослушан, по што ќе биде донесена одлука за понатамошното постапување“, соопштиле од Обвинителството.

- Advertisement -

Инцидентот го потврди и Српската напредна партија (СНС) која соопшти дека мајката на Александар Вучиќ, била вербално и физички нападната во непосредна близина на пазарот Калениќ во Белград.

Според СНС, „група помлади мажи, политички блиски до блокадитерите, ја турнале Ангелина Вучиќ, ѝ викале и ѝ ги искинале торбите со намирници што ги носела од пазарот“.

„Таквото однесување е недозволив чин на агресија, понижување и заплашување што заслужува најсилна осуда. Ничија мајка, ничија баба и ниедна жена не треба да бидат цел на насилство поради политички разлики. Нема оправдување за агресија врз жена само затоа што е мајка на Александар Вучиќ“, се истакнува во соопштението за медиумите на СНС.

Денеска во Србија се гласа на вонредни парламентарни избори. Вкупниот број на гласачи во единствениот избирачки список е 6.450.523. Гласачките места се затвораат во 20 часот. Изборниот молк е на сила до затворањето на гласачките места. Се гласа за еден од 18-те изборни листи.