ЗАБОРАВЕТЕ НА РОВОВИТЕ, ВО УКРАИНА ЗАПОЧНА „ВОЈНА ВО ЦЕВКОВОДИ“

Војната во Украина добива нова, речиси нереална димензија. Поради целосната доминација на беспилотните летала на небото, двете армии масовно се спуштаат под земја, водејќи брутални битки внатре во напуштените советски гасоводи и водоводни мрежи.

Денес на социјалните мрежи, преку профили како оној на воениот аналитичар Марио Навфал на „X“, се прошири шокантна снимка од термална камера која доловува дел од оваа подземна тактика.

На видеото се гледа како руски војник користи алат за сечење (бренер) за да направи отвор и да продре во стратешки важна подземна цевка на фронтот кај Купјанск. Меѓутоа, тој нема претстава дека цевката веќе е окупирана од украински војници.

- Advertisement -

Во моментот кога металот е пробиен, еден од украинските бранители ја насочува цевката од својата автоматска пушка директно низ новоотворената дупка и испукува цел шаржер кон напаѓачот.

Како што пренесуваат угледните светски медиуми, вклучително и „The Wall Street Journal“, движењето по површината на земјата стана еднакво на „смртна казна“ поради постојаното набљудување и напади од дронови.
Поради ова, руските сили обучуваат специјални единици кои ползат со километри (понекогаш и до 15 километри) низ тесни напуштени советски цевки со дијаметар од само 1 до 1,2 метри. Целта им е да излезат зад украинските одбранбени линии и да извршат изненадувачки напади.

Украинската 13-та бригада „Хартија“, која го брани Купјанскиот правец, потврди дека веќе со месеци води исцрпувачка војна во овој подземен лавиринт. Руските војници внатре во цевките поставуваат митралески гнезда, барикади од вреќи со песок, па дури и импровизирани конаци каде остануваат со недели во услови на задушување и недостаток на кислород.

Како контрамерка, покрај директни престрелки, украинската армија почна да испраќа и мали копнени роботски дронови полни со експлозив (C4) за да ги разнесе руските позиции внатре во самите цевководи.