Еврокомесарката не бираше зборови за да упати порака кон Црна Гора

Билатералните спорови со Хрватска не се дел од преговорите за членство во Европската Унија, но Црна Гора мора да ги реши доколку сака да го заврши пристапниот процес.

Ова е пораката што еврокомесарката за проширување Марта Кос ѝ ја испрати на Подгорица, нагласувајќи дека, без оглед на техничкиот напредок во преговорите, за прием во Унијата е неопходна согласност од сите 27 земји членки.

– Тука би го разграничила техничкиот процес од поддршката што секоја земја кандидат мора да ја добие од сите 27 членки на Европската Унија. Она што го постигнавте во Црна Гора во последните 3 години навистина се случува еднаш во животот. Постигнавте огромен напредок и навистина сум горда на вас – изјави Кос.

- Advertisement -

Еврокомесарката нагласи дека Хрватска отворено ги застапува своите интереси и дека нивното решавање е важно за продолжување на европскиот пат на Црна Гора.

– Вие направивте речиси сè на тоа ниво, ни недостига само уште малку. Но, ако сакаме да одиме понатаму во овој процес во Брисел, потребна ни е согласност од сите 27 членки. Хрватска ги има своите интереси и отворено зборува за нив – рече еврокомесарката.

Кос изрази задоволство од последните чекори на црногорските власти и од продолжувањето на дијалогот со Загреб.

– Драго ми е што Црна Гора презеде одредени чекори во последните денови и што постои дијалог меѓу Хрватска и Црна Гора. Мислам дека сте на добар пат да ги решите и овие билатерални прашања. Тие не се дел од преговарачкиот процес, но поради сето она што го објаснив, мора да бидат решени – порача Кос.

Нејзината изјава доаѓа во време на засилени дипломатски контакти меѓу двете земји, откако Хрватска побара решавање на повеќе отворени прашања пред завршувањето на црногорските пристапни преговори.

Црна Гора е блиску до решавање на 3 спора со Хрватска, изјави министерот за надворешни работи Ервин Ибрахимовиќ на 19 октомври, во обид да се надмине новата пречка на патот кон Европската Унија. Најавата следува откако хрватскиот премиер Андреј Пленковиќ издејствува од нацртот на европските заклучоци да бидат отстранети роковите за завршување на црногорските пристапни преговори.

Ибрахимовиќ, во гостување на Радио-телевизија Црна Гора, најави дека Подгорица подготвува одговор за името на базенот во Котор, спомен-плочата во поранешниот логор Морињ и обесштетувањето на поранешните затвореници.

Засега нема потврда дека Загреб ги прифатил најавените решенија. Хрватска отвори вкупно 8 спорни прашања со Подгорица, меѓу кои се и исчезнатите лица, воените злосторства, имотните барања, разграничувањето на морската граница на влезот во Бока Которска и школскиот брод „Јадран“.

Хрватскиот премиер претходно интервенираше во Брисел за измена на нацрт-заклучоците на Европскиот совет.

И покрај отворените прашања со Хрватска, Кос смета дека Црна Гора има реални изгледи да го потпише пристапниот договор до летото 2027 година и да стане 28. членка на Европската Унија во 2028 година.

Еврокомесарката го поздрави и усвојувањето на уставните измени поврзани со проверката на интегритетот на кандидатите за владини функции, оценувајќи дека со тоа Црна Гора се приближила до затворањето на преговарачкото поглавје 23.

– Тоа е одличен резултат што покажува дека вашите пратеници разбираат зошто сега е важно, со спортски речник, да кажеме дека сте во финалето на еден од најважните натпревари во историјата на Црна Гора – изјави Кос.

Еврокомесарката одговори и на прашањето за претседателот на црногорското Собрание, Андрија Мандиќ, кој беше критикуван поради изразување сочувство до семејството на осудениот воен злосторник Ратко Младиќ.

Кос нагласи дека за раководството на парламентот одлучуваат исклучиво пратениците, но предупреди дека величењето воени злосторници е неспоиво со европските вредности.

– Само Собранието може да одлучува за своето раководство, никој друг. Во Европската Унија навистина нема место за величење воени злосторници – изјави еврокомесарката.

Таа додаде дека помирувањето и почитувањето на жртвите се вредности на кои Европската Унија им придава особено значење.