FT: Нетанјаху планирал повторно да го нападне Иран овој месец; Трамп го спречил тоа поради изборите на средината на мандатот

Израелскиот премиер Бенјамин Нетанјаху планирал да изврши напади врз Иран претходно овој месец, но американскиот претседател Доналд Трамп се спротивставил на повторното разгорување на конфликтот пред изборите на средината на мандатот во неговата земја, објави „Фајненшел тајмс“ (Financial Times).

Три лица запознаени со случајот изјавиле за весникот дека израелската војска била подготвена да изврши напади за време на викендот на 10 октомври, таргетирајќи ирански нуклеарни постројки, објекти на режимот и цивилна инфраструктура – ​​вклучително и енергетски капацитети – пренесува „Тајмс оф Израел“ (The Times of Israel), повикувајќи се на „Фајненшел тајмс“.

Сепак, неименувани извори навеле дека Трамп одлучил да не дозволи повторно разгорување на конфликтот пред американските избори на средината на мандатот, закажани за 3 ноември.

- Advertisement -

Според изворите, нападите би биле поинтензивни од оние што САД и Израел ги извршија во февруари.

Во извештајот се напоменува дека останува нејасно дали САД би се приклучиле на нападите. Сепак, еден извор изјавил за весникот дека „не е нереалистично сценарио“ конфликтот повторно да се разгори во наредните недели. Еден извор наведува дека Израел подготвил нова листа на цели, која вклучува објекти на цивилната инфраструктура што претходно не биле цел на напади.

Друг извор сугерира дека нападите планирани од израелската војска претходно овој месец можеби биле дел од преговарачка тактика, при што се напоменува дека одлуката за тоа дали повторно да се активира конфликтот зависела од Трамп.

Според „Фајненшел тајмс“, Пентагон не ја коментирал оваа информација.

Извештајот е објавен два дена откако американскиот секретар за одбрана, Пит Хегсет, наводно остварил тајна посета на Израел за да се сретне со Нетанјаху и да разговара за „регионалните закани“.

Ова не е првпат во последните недели да се појават извештаи кои сугерираат дека Нетанјаху се залага за напади. На 9 октомври, Трамп изјави дека Вашингтон нема да го нападне Иран пред изборите во средината на мандатот – ова доаѓа само неколку дена по извештаите дека началникот на Генералштабот на израелската војска, генерал-полковник Ејал Замир, им кажал на своите американски колеги оти таков напад би можел да доведе до одложување на изборите во Израел, кои се закажани за следната недела.

Според информациите, Израел проценува дека Иран би одговорил на американски напад со изведување масовни ракетни удари врз Израел.

Минатата недела, „Канал 12“ објави дека Нетанјаху го повикал Трамп да го обнови конфликтот со Иран пред изборите во Израел на 27 октомври и изборите во САД во средината на мандатот на 3 ноември.