Почина човекот со најголемо срце, Македонија тагува за Васко Јолески

Починa Васко Јолески од Струга, претседател на Националното здружение „Храбро срце“ и симбол на храброста и надежта за живот. Повеќе од шест години живееше со механичка пумпа за поддршка на срцето, во очекување на донорско срце.

Срцевата слабост му беше дијагностицирана во 2011 година. Кога состојбата сериозно се влоши, во 2020 година му беше вградена механичка потпора, која требаше да му го продолжи животот до трансплантацијата. Оттогаш неговиот живот зависеше од батерии, кабли и редовни контроли, но надежта никогаш не го напушти.

Јолески не се бореше само за себе. Како претседател на здружението, беше глас на пациентите со механичка циркулаторна потпора. Јавно зборуваше за високите трошоци за лекување, за потребата од ослободување од партиципација и за подобри услови за терапија и следење на здравјето. Со своите апели и сведоштва ја подигнуваше и свеста за органодарителството.

- Advertisement -

По долго чекање, конечно се појави компатибилно срце. Јолески со радост и верба ја прифати можноста да биде првиот пациент со механичка циркулаторна потпора кај кого ќе се направи обид за трансплантација. Тоа беше надеж не само за него, туку и за сите што со години го чекаат својот повик. На дел од новинарите им вети дека по една недела ќе даде интервју од болницата. За жал, судбината имаше поинаков крај.

Јолески остава зад себе неизмерна тага, но и порака што не смее да згасне: секој човек заслужува шанса, секој пациент заслужува надеж, а едно човечко срце може да продолжи да живее и во некој друг.

Почивај во мир, Васко,сочуство до фамилијата

СОС БАЛКАН МЕДИА Охрид