Трамп беше прашан зошто одбива да го нарече Путин диктатор, иако така го опишува републиканскиот сенатор Ден Саливан, кого Трамп го поддржува

Претседателот на САД Доналд Трамп беше прашан зошто одбива да го нарече рускиот претседател Владимир Путин диктатор, иако така го опишува републиканскиот сенатор Ден Саливан, кого Трамп го поддржува.

– Морам да склучувам договори со луѓето, па затоа не ги навредувам. Јас правам договори, отсекогаш сум бил многу добар во тоа. Станав многу богат благодарение на договорите што ги склучив. Затоа не одам наоколу исмевајќи ги луѓето – изјави Трамп.

Прашањето му го постави новинарот Џон Декер во интервју за американската телевизиска мрежа „Греј телевижн“, потсетувајќи го дека Саливан го нарекува Путин диктатор и авторитарен лидер на режим од, како што вели Декер, мафијашки тип.

Го нарече Зеленски „диктатор без избори“

- Advertisement -

Објаснувањето на Трамп е во спротивност со неговата реторика кон Зеленски. Трамп во февруари 2025 година го нарече украинскиот лидер „диктатор без избори“, обвинувајќи го дека одбива да организира гласање.

„Диктатор без избори, Зеленски подобро да дејствува брзо или нема да му остане држава“, напиша тогаш Трамп на својата социјална мрежа „Трут соушал“.

Неговата критика дојде и покрај фактот што Украина не може да организира претседателски избори додека е во сила воената состојба, воведена по руската инвазија во февруари 2022 година.

Повторно го обвини Бајден за војната

Разликите меѓу Трамп и сенаторот Саливан не се ограничуваат само на оценките за Путин. Републиканскиот сенатор се противи и на неодамнешниот договор поврзан со рускиот дизел, додека Трамп смета дека неговата продажба на светскиот пазар ќе придонесе за намалување на цените.

Американскиот претседател повторно го обвини својот претходник Џо Бајден за избувнувањето на војната во Украина.

– Една од причините зошто воопшто започна таа војна е тоа што Бајден се потсмеваше со Русија и со сите други, а не знаеше што прави. Таа војна никогаш не требаше да започне – рече Трамп.

Тој го повтори и тврдењето дека руската инвазија немало да се случи доколку останел претседател по изборите во 2020 година, за кои повторно тврдеше дека биле наместени.

Во однос на рускиот дизел, Трамп објасни дека не станува збор за негово директно купување од страна на САД, туку за овозможување продажба на други пазари.

– Нафтата не доаѓа кај нас. Станува збор за дизел за кој има побарувачка. Сметам дека е одлично што се пласира на глобалниот пазар, бидејќи тоа значително ќе ја намали неговата цена – изјави тој.

„Иран ќе падне многу скоро“

Трамп во интервјуто зборуваше и за војната со Иран, најавувајќи нејзино скоро завршување и значително намалување на цените на горивата.

– Цените на нафтата ќе паднат штом ќе завршам со Иран, а тоа ќе биде многу наскоро. Тие се поразени во секој поглед. Нивната војска повеќе не постои, нивната морнарица, нивното воено воздухопловство, сè е уништено – тврдеше американскиот претседател.

Според Трамп, иранското раководство е толку ослабено што Вашингтон веќе не знае со кого треба да преговара.

– Таму има луѓе што дури и не ги познаваме. Искрено, со кого воопшто разговараме? Никој не е сосема сигурен. Никој не сака да биде лидер. Иран ќе падне многу наскоро – изјави Трамп.