Државјанин на Саудиска Арабија е обвинет дека тајно поставил уред за снимање во една од канцелариите на компанијата „OpenAI“ во Калифорнија

Државјанин на Саудиска Арабија е обвинет дека тајно поставил уред за снимање во една од канцелариите на компанијата „OpenAI“ во Калифорнија, соопштија федералните обвинители. Подоцна било откриено и како го извел тоа.

Абдулрахман Алфозан, кој работел како инженер во компанијата за вештачка интелигенција, е обвинет за користење или обид за користење електронски, механички или друг уред за прислушување усна комуникација.

Од „OpenAI“ соопштија дека откриле „софистициран уред за снимање“, скриен во нивната канцеларија во Сан Франциско, по што го известиле Федералното истражно биро (ФБИ). Од компанијата наведоа дека ги искористиле сопствените модели на вештачка интелигенција за да утврдат дека уредот го поставил еден од вработените.

- Advertisement -

Според обвинителите, уредот бил завиткан во тоалетна хартија и вметнат во USB-приклучокот на задната страна од телевизорот во конференциската сала наменета за состаноци на раководството.

„OpenAI“, компанијата што го создаде популарниот чет-бот „ChatGPT“, соопшти дека нема индиции оти за време на инцидентот дошло до неовластен пристап до изворниот код, параметрите на моделите или корисничките податоци, ниту дека тие биле украдени. Компанијата потврди и дека вработениот бил отпуштен.

– Според обвинението, Алфозан наводно сокрил уред за тајно снимање во конференциската сала на раководството на својот работодавач, со цел тајно да снима доверливи разговори – изјави директорот на ФБИ, Кеш Пател.

Според обвинителите, Алфозан работел како инженер во „OpenAI“ од јули 2025 година.

Вработените во „OpenAI“ го откриле уредот на 30 септември, два дена откако, според обвинителите, бил поставен. Од обвинителството соопштија дека уредот бил шифриран.

Од „OpenAI“ наведоа дека успеале да ги искористат сопствените модели на вештачка интелигенција „за да го разберат самиот уред и неговото потекло, како и да утврдат дека неколку дена претходно го поставил конкретен вработен“.

Според податоците на ФБИ, осомничениот користел алатка за продуктивност и чет-бот за да истражува чувствителни локации во просториите на „OpenAI“, како и начини за тајно поставување аудиоопрема.

Меѓу прашањата што наводно ги внесувал во чет-ботот биле оние поврзани со „изработка, приспособување, инсталирање, снимање звук, тестирање, прикривање и далечински пристап до уредот“, тврдат обвинителите.

Тој е обвинет и дека го користел чет-ботот за да се распрашува за „изработка на уред за непрекинато снимање звук“, „приспособување на Wi-Fi-поврзувањето“, „подобрување на звукот и слушање во реално време“, како и за „шифрирање на SD-картичка“.

Обвинителите наведуваат дека на 5 октомври Алфозан се вратил во канцеларијата за да го провери уредот. За да го поврзат со местото на настанот, истражителите користеле снимки од безбедносните камери.

Истиот ден, Алфозан оставил торба без надзор во друг дел од зградата. Безбедносниот тим на „OpenAI“ ја отворил торбата и во неа ги пронашол неговиот паричник и личните документи, како и уште еден уред за снимање, сличен на оној што бил откриен во конференциската сала, наведуваат обвинителите.

Алфозан во вторникот се појавил пред судот. Засега не е познато дали има правен застапник.

Доколку биде прогласен за виновен, му се заканува затворска казна до пет години и парична казна од 250.000 американски долари, односно околу 187.000 британски фунти.