По серијата скандали Кимберли Гилфојл не е веќе амбасадорка на САД во Грција

Американската амбасадорка во Грција, Кимберли Гилфојл, поднесе оставка во вторникот, 13 октомври, откако Белата куќа официјално побара од неа да се повлече од функцијата по серијата медиумски извештаи за наводно несоодветно однесување. Гилфојл, поранешна свршеница на Доналд Трамп Џуниор, ги отфрла обвинувањата и најави дека ќе се бори за зачувување на своето име и углед.

„Ја замоливме амбасадорката Гилфојл да поднесе оставка. Таа беше голема придобивка за нашиот тим и ѝ посакуваме сѐ најдобро“, изјави портпаролката на Белата куќа, Кејти Захарија.

Гилфојл потоа објави дека заминувањето од дипломатската функција нема да ја промени нејзината поддршка за Трамп и неговото политичко движење. „Овие обвинувања се лажни и решена сум енергично да ги бранам моето име, углед и интегритет“, напиша таа на Икс.

- Advertisement -

Одлуката следуваше откако американскиот претседател Доналд Трамп ден претходно изјави дека неговата администрација ја разгледува можноста да ја смени амбасадорката и дека не е задоволен од она што го прочитал во медиумите. Според американските медиуми, случајот предизвикал незадоволство и кај државниот секретар Марко Рубио.

„Волстрит џурнал“: побарала 100.000 долари за сметка од „Американ експрес“

Во центарот на скандалот се наводните пораки меѓу Гилфојл и Ерик Детерс, американски бизнисмен, адвокат, медиумски водител и донатор на политичкото движење на Трамп.

Според истражувањето на „Волстрит џурнал“, објавено на 7 октомври, Гилфојл побарала од Детерс да ѝ помогне да плати сметка од кредитната картичка „Американ експрес“ во износ од 100.000 долари, во периодот пред нејзиното потврдување за амбасадорка во Сенатот.

Весникот објави наводни текстуални пораки во кои таа бара пари и објаснува како да се изврши уплатата. Детерс не ја платил сметката. Тој тврди дека во текот на годините ѝ исплатил на Гилфојл околу 300.000 долари за говорнички ангажмани.

Според неговите тврдења, Гилфојл му нудела пристап до високи функционери во администрацијата на Трамп. Наводните пораки сугерираат дека таа барала од него да избегнува писмени траги од финансиските договори, бидејќи објавувањето на таквата комуникација можело да ѝ ја загрози амбасадорската функција.

Од обвинителка и телевизиска водителка до најтесниот круг на Трамп

Гилфојл не е дипломат од кариера. Таа е поранешна обвинителка во Калифорнија, а пошироката американска јавност ја запозна како телевизиска водителка и политичка коментаторка на „Фокс њуз“, каде што работеше од 2006 до 2018 година.

Нејзината врска со семејството на претседателот е особено важна за разбирање на нејзината политичка кариера. Гилфојл започна да се забавува со Доналд Трамп Џуниор, најстариот син на претседателот, во 2018 година. Двајцата се свршија во 2020 година, но кон крајот на 2024 година објавија дека се разделиле.

Во меѓувреме, таа имаше значајна улога во политичките активности на републиканците, вклучително и во собирањето пари за кампањата на Трамп во 2020 година. Нејзините говори на партиските собири и јавната поддршка за претседателот ја направија препознатливо лице на неговото политичко движење.

Трамп ја номинираше за американска амбасадорка во Грција во декември 2024 година, по победата на претседателските избори. Сенатот го потврди нејзиното назначување во септември 2025 година, а таа пристигна во Атина во ноември истата година.

Американскиот гас, пристаништето Пиреја и судирот со Кина

За време на престојот во Грција, Гилфојл особено ја промовираше енергетската соработка со САД, вклучително и зголемувањето на увозот на американски течен природен гас во Европа.

Но, нејзиниот мандат беше проследен и со дипломатски контроверзии. Во јавни настапи таа побара Кина да го продаде својот удел од 67 отсто во пристаништето Пиреја, едно од најважните поморски и трговски упоришта на Кина во Европа.

Кинескиот амбасадор во Грција, Фанг Чиу, ги критикуваше изјавите на Гилфојл, оценувајќи дека тие одразуваат застарен и штетен начин на размислување.

Однесување неспоиво со дипломатијата

Покрај случајот со наводното барање 100.000 долари од политичкиот донатор, на Гилфојл ѝ се ставаат на товар и други спорни постапки. Според „Волстрит џурнал“, таа наводно се заканувала дека САД можат да влијаат врз соборување на грчката влада, ги промовирала деловните интереси на грчката градежно-енергетска компанија „Актор“ и на нејзиниот лобист му овозможувала да присуствува на дипломатски средби, при што некои соговорници наводно мислеле дека тој е шеф на нејзиниот кабинет.

Медиумот објави и дека грчки бизнисмени ѝ плаќале луксузни патувања со приватни авиони и престои во скапи хотели, меѓу кои и во Париз, а таа се фалела со тие врски додека се обидувала да обезбеди покана за вечера во Давос во чест на Ерик Трамп. Дополнително, британскиот „Дејли мејл“ објави поплаки дека таа имала испади кон вработените во амбасадата и дека нејзиното однесување предизвикувало незадоволство меѓу дипломатскиот персонал.