Сикорски очекува моќни европски армии до 2030 година

Улогата на Европа во глобалната распределба на моќта е доведена во прашање, поради што е неопходно итно да се интензивираат напорите за зајакнување на европската одбрана, предупреди денеска полскиот министер за надворешни работи Радослав Сикорски на Варшавскиот безбедносен форум.

– Ако го направиме само она на што веќе се обврзавме на самитот во Хаг и на самитот во Анкара, тогаш до крајот на деценијата ќе имаме армии со кои рускиот претседател Владимир Путин нема да може успешно да се справи – истакна Сикорски.

Тој додаде дека прашањето не е дали Европа ќе биде окупирана, туку дали САД, Кина и Русија самите ќе ги определуваат сферите на влијание во светот, оставајќи ја Европа во улога на обичен снабдувач на податоци и туристичка дестинација или пак таа ќе се избори да стане „третиот столб“.

- Advertisement -

Британскиот министер за надворешни работи Ед Милибанд, кој исто така говореше заедно со Сикорски на форумот, предупреди дека основните вредности, како што се слободата, демократијата, мултилатерализмот и владеењето на правото, се загрозени ширум светот и дека бараат борба „на сите фронтови“.

– Улогата на Европа во ова е од суштинско значење за зачувување на светскиот поредок што би го препознале и кој навистина би го правел она што е исправно за нашите деца – рече Милибанд.

Тој апелираше таканаречената хибридна војна да се сфати многу посериозно и да се разгледаат сите расположливи средства за нејзино одвраќање и спротивставување. Покрај тоа, британскиот министер истакна дека е потребно несмалено да продолжи поддршката за Украина на сите полиња, вклучително преку финансиска и енергетска помош, како и со дополнително заострување на санкциите против Москва.

Осврнувајќи се на хуманитарниот аспект на војната во Украина, Милибанд ја подвлече важноста од почитување на Меѓународниот кривичен суд и Меѓународниот суд на правдата, особено во сегашниот момент.

– Ако се залагаме за меѓународен поредок заснован на правила и го почитуваме меѓународното право, тогаш како демократии е исклучително важно да ги поддржуваме тие принципи, бидејќи тие се важни механизми за утврдување одговорност – заклучи Милибанд.